Read Alladian MIRILUNGGU 68 Bible Online

MIRILUNGGU 68 - Alladian bible

MIRILUNGGU 68

¹Shédí bí gerepdung, delokke miru kídíem monpan sudung. Bím kangkina kídíe molang gemala duggedung.

²Míkkíem mutpaknam kísape bí bulum monpakto. Mutkyone emelo yolnam akampe, atímana mirul amikídíe Shédíke keralo nyokyindo.

³Idakkom deenampe yénade Shédíke keralo ashépe yédung. Bulu yépope yédung, delokke ashénge séngéédung.

⁴Shédíkíng miri lulangka, Bíkke amínem rínggelangka; doomuglok yopna tesim bedang mobitola. Bíkke amíne RUUTUM, bíkke keralo ashélangka!

⁵Shédí bíkke deena Kumkeng Ekumlo duula ane-abu kamana opan kídíem ankíla, delokke meyéng kídíem mosiidung.

⁶Bí ekum kamanem dungkengem bila, delokke pateklo duunem ashépe yésu modungku. Idola akpésuna kídíde mootum moorang amolo duuyé.

⁷E Shédía, amikídí keralo nokke gíge boduem, nokke mooruk amolok enbo dokuem

⁸amonge tonto, taleng telok pedonge obito; de Sinai díítelok aana Israelke Shédíke angkolok dekepe ito.

⁹No pedongem doodípe dímoto, delo nokke ereena amongem aimotoku;

¹⁰nok amikídíe delo dungkengem paato, nokke aikolok, no pííramna kídíem bito.

¹¹RUUTUM bí lulíkto, delo mime kídíe agomem pogobito.

¹²“Roja kídíelang buluke sipaying kídíe dugge dungku!” Ekumlo duusuna mime kídíe mimaklok rotbín namem orpansuto.

¹³Arem yuklubsuna pekí noksang alabe, uun asir kísa taaporla dung. (Nolu ayokone kapeila mimak ido longem mér bénbam gooralo dunggekane?)

¹⁴Tolna yalum Shédíke roja kídíem, Salmon díítelo monpan sulíkduem delo tapamem omoto.

¹⁵Kape kedon runakoi Bashan dííte si ponyug bojéna díítekoi!

¹⁶E ponyug bojéna dííte no, Shédíke duupe emla míngko dííte no, kapeila kangkipe kaadune? RUUTUM bí delo duuyaryé!

¹⁷Deddína mimak inana guré-gaariem éjar éjar bomala, RUUTUM bí Sinai dííte lokke deena amolo aadung.

¹⁸Bí deddína mimaklo umnam abílem bomla teyolo reesadung, bí akpésuna kídílok amanemte torík sudung. RUUTUM Shédí bí delo duuyé.

¹⁹RUUTUMme koyitlangka, ngoluke egedem loodípe gebine bímin. Bímin ngolum iturkuna Shédíe.

²⁰Ngoluke Shédí bí, turmokuna Shédíe; Bímin RUUTUM, ngoluke Ruutume. Bí ngolum sikolokke laasingkune.

²¹Paab bedalok gítína miru kídíke dumpongem Shédí bí berokpe demkéyé.

²²RUUTUM bí poto, “Ngo noluke miruem Bashanlok laalenyéku, ngo bulum siyéng aralok laalenyéku,

²³delo nolu noluke alem miru kídíke iyyilok arbín sunayéku, delokke noluke ekiie edítko paklayédí yagman mantíyé.”

²⁴E Shédíe, nok mimagem ikumla yonku namem takame kaato, ngokke Roja Shédíke agí dungkolo kéémíng yingang kunamem kaato.

²⁵Mirilune keralo, miri mone méélamlo, opéé annyi raadalo mime kídíe dumdum dííla gíto.

²⁶“Ami baane gooralo Shédíme ríngge langka, RUUTUM me koyitlangka, E Jakobke otíng kídía.”

²⁷Kerayalumpe bosé yalumna opéé lokke Benjamin bí gígeto, delokrongem Judahke miri kídíe buluke opéé gooralo gídung, dem nínmín gene Jebulun kelang Naphtalike miro kídíe.

²⁸Nokke ralnamem lengkantoika, E Shédía, ngoluke legape rallíknamem lengkantoika.

²⁹Nokke Jirusalem Kumkeng Ekumlok rojakídíe nom amanem bombidung.

³⁰Ijipt moonam pasumlo yéna simon kídídem lulangka, angu opín kídíke oo bona gooru sobénem lulangka, bulu arem tadogem nom kumsudola bimang teteloope. Mimak ilíína kídíem rego regolo menyok langka.

³¹Mirokídíe Ijiptlok aayé; Sudan amikídíe Shédíme alage lengonla kumyé.

³²Among sokke doolung kídíe, Shédíkíng miri lulangka; RUUTUMme miripe ríngge langka.

³³Taleng telo saala konnying mennyingkai duuna bíkkíng miri lulangka. Tattola bíkke agomem, bottena agomem bí melíkdung.

³⁴Shédíke ralnamem pogoo langka; bíkke kekímde Israello dung, bíkke tolnamde taleng píídung.

³⁵Kumsukolo duuna Israelke Shédí bí peso penamrungko, bí agíke amikídíem tolnam emlang ralnamem bidung. Shédíme koyitlangka.