Read Alladian MIRILUNGGU 69 Bible Online

MIRILUNGGU 69 - Alladian bible

MIRILUNGGU 69

¹Ngom mosingtoika, E Shédía!

²Asie ngokke alíng so píídubong, ngo suyung aralo yuulum dakbong, ngokke tuda supeko kayimang; ngo siranglo aadak, delokke sipyare ngom tarlum bomdak.

³Ngo kaptíkolok lísi kapsi sudakbong, ngokke línggusi kiname, ngokke Shédíme toyangkolo ngokke amige miklup dakbong.

⁴Atí legang kamape ngom kangkina kídíe ngokke dumíd emte bojéyadung. Ngokke miru kídíe ngok teyolo metí yattídung; bulu ralneke ngom mokape idung. Ngokke pyoomanam atíem bulu ngom dormodungku.

⁵E Shédía, no ngokke midem kéndung; ngokke imemnam atíem no mesupmang.

⁶E Ralna yalum RUUTUM, nom míídasula yéna kídíem ngokke legape annying momayika; E Israelke Shédía, nom matana kídíem mínggíp sudope ngok legape imomayika.

⁷Si nokke legalokmin ngome lupu-luyéétone, delokke ngo annyingem pokom sutone.

⁸Ngo ngokke bírokepe mibope ikai, ngokke erangkepe ngo luyu amipe ikai.

⁹Ngokke nok Kumkeng Ekumlo kumsuname eme kísape ngokkíng dungkai; nom lupu-luyééname ngokkíng angkai.

¹⁰Ngo agísue domape nyodola, mínggípsuto, delo amie ngom lukaato;

¹¹Ngo agíe ankí-keno leemuem geto, delo bulu ngom ngilkaato.

¹²Bulu bedu bedalo ngom poge lugeto, delo tíngírsuna kídíe ngom miripe goggeto.

¹³E RUUTUM, ngokke pedan, ngo nom kumyé, E Shédía, nokke mííbasunam moodílo ngom poyan sutoyika. Nokke bottena ayanglok delokke nokke mosing dokupe pébisunam agomlok ngom poyan sutoyika.

¹⁴Suyulo yuulum momape ngom laasing toyika, ngokke miruem itumtoyika, eerína asilokke ngom gaksing toyika.

¹⁵Ngokke teyolo puumuem aamomaika; ngom sine gooralo obung momayika, demangkom deerulo olík momayika.

¹⁶E RUUTUM, ngom poyan subika; kapeila nokke duuyarna ayangde aine; nokke yaarí kayimana ayanglok ngokkíng ngébang tokuyika.

¹⁷Nokke béérang lok nokke mingmuem mesup sumayika; kapeila ngo adírla dung, ngom menape poyan sutoka.

¹⁸Ngokkíng aala ngom laasitoyika; ngom mirulokke itumtoyika.

¹⁹No kénsudung edítko ngom lurééton, edítko ngom lupu luyééton, delokke lungilton; no ngokke miru takamem kaayindung.

²⁰Lurééname ngokke aangem kimoto, ngo mííré along sukai. Ngom pogul igulna matato, idola atelkote katomang; ngom ngiipena matato, idakkom ngo atelkote paamang.

²¹Ngokke kenoduem, bulu ngom díknem bito; ngokke tíílíduem bulu ngom kosaanem bito.

²²Buluke arane bulum dosu daklangka; buluke adeng-apede bulum nyokmo daklangka.

²³Bulum míngma molangka, buluke lamkuem agínpe kimolangka.

²⁴Nokke marlínge bulukíng píílangka; nokke míínyinge bulukíng píílangka.

²⁵Buluke notkodem nyokmo daklangka. Sékote buluke notkodelo duuyimadope idaklangka.

²⁶Nokke ingéénam kídíem bulu iréédung; nokke tarí iketnam kídí legangem bulu potígedung.

²⁷Buluke paab inamem sanbom tete langka; nokke turko bedang delo buluke tarong kamo mapeka.

²⁸Bulum turnam kitab lokke buluke amínem moltít langkuka; nokke amikídí gooralo buluke amínem ilík mapeka.

²⁹Idakkom ngo kiname molarumang; E Shédía, ngom laasing tokuika!

³⁰Ngo Shédíke amínem mirilok rínggeyé; ngo bíkke bottena amínem pogong gela yidgeyé.

³¹Si RUUTUM bím gooru pabinamem pemílo demangkom bopang arbinamem pemílo ashémoyadung.

³²Iréénam kídíe dem kaayém ashéyé; Shédíme kumna kídíe eryéku.

³³Kapeila RUUTUM bí mimang-opan kídíem tatbila, pateklo duuna bíkke ami kídíemte mepak sumang.

³⁴Among talengelang siyénge, delokke delo duuna takame, Shédíme yidgelangka.

³⁵Legade Shédí bí Jirusalem em mosiyéku, delokke Judah doolungem morepyéku. Bíkke amikídíe delo duula amongem bomyé.

³⁶Bíkke bééralok otíng-oyine dem duubomyé, delokke bím ayangna kídíe delo duuyé.