Read Alladian MIRILUNGGU 73 Bible Online

MIRILUNGGU 73 - Alladian bible

MIRILUNGGU 73

¹Shédí bí aropakpe Israello aang aro gena kídílo aidung.

²Idakkom ngokke míídíí suname nyokdagai; ngokke míngkengem menyok sudagai,

³kapeila atímana mirul kídíke remnamem kaala adum-alena kídíem ngo nesurunge ito.

⁴Buluke adír asong kamang, bulu toldung, delokke amíle ekerdung.

⁵Ami abíd kísape bulu ankí keno kamang.

⁶dekepe iname mííte sunamem bulu lunggupe gedung, delokke díínam monamem egepe gedung.

⁷Buluke aanglok atímanam atíem melendung, buluke aapíde atímana agér ipe saapenam mílílo míítídung.

⁸Bulu amikídíem ngilkaala atímana atíem podo; bulu míngkímsune delokke amiem iréépe míítíne.

⁹Teyong telo duuna Shédíme bulu atímana agomem ludung delokke amosokke tanikidíem luuk pouk líkdung.

¹⁰Dekepe ila Shédíke amiekom bulukíng gílat sulík dungku; delokke bulu ingkuem poyédí dem arope míídung.

¹¹Bulu podung, “Shédí bí kénmayé; Teyong yalum Shédí bí kaamayé.”

¹²Kaalangka, dekepemin atímana mirul amie idune. Bulu deddíne kadung, delokke agínpe paabandung.

¹³Demílo, ngo agísuem deenampe mesunamsi, delokke paab imape duunamsi duumem dunía?

¹⁴E Shédía, no ngom lolope adírmoto; rodíke ngom no ingééto.

¹⁵Ngo sikena agomem potuamílo, ngom nokke amipe sanmayai.

¹⁶Ngo sim legasim míngkíto, idakkom si ngokkepe mííla rumanamko.

¹⁷Nokke Kumkeng Ekumlo gírong emmin atímana kídíem kape iyékudí dem ngo kénkane.

¹⁸Aropakpe no bulum nyokyin dokupe yullap supeko amolo melíkyé.

¹⁹Bulum menang asak petpakdakku, bulu pesorunamlo nyoklíkdung.

²⁰Dekede rokomem mitpan sukunam immang kísape idung; RUUTUMe, edílo no gerepyédí bulu nyokyéku.

²¹Ngokke aapíe kosaaduem aangekom kigeto;

²²ngo simon kísape midetuai, ngo nom ankén matuai.

²³Dekepe idokom ngo nokkíng aníndung; no ngom alaglok gakbomdung.

²⁴No ngom nokke ngiitomlok yéboto, delokke yéyinlo no ngom mínggela laayéku.

²⁵Nokke kékonlo, teyotelo séko ngokkepe kadun? Dekepe ila ingkuemte ngo tani amoso míímang.

²⁶Ngokke amíle, ngokke aange ralyimayépe, idakkom Shédí bí ngokke tolname, ngokke taronge.

²⁷Kaalangka, nokkelok mootena kídíe berokpe nyokyéku; nom míngkesumana kídíem no petyinyéku.

²⁸Idakkom ngokke pedan Shédíkíng anín namde edítko ainame; RUUTUM Shédíme ngokke duusi sukepe metung, ngo bíkke agér inam takamem pogeyé.