Read Alladian MIRILUNGGU 77 Bible Online

MIRILUNGGU 77 - Alladian bible

MIRILUNGGU 77

¹Ngo bottepe kapdung, Shédí bí taddope emla Shédíkíng bottepe kabbisudung.

²Ankí keno longelo ngo RUUTUMme matadung; yoh rubungem ngokke alage lengonla kumtídung depe ilate ngo míípomang.

³Ngo Shédíme míítídung, delokke aang odung; ngo mííngíng kídung, idola ngo mínga sudung.

⁴Bí ngom yoh daran modung. Dekepe ngo míídírlok agomkote lulamang.

⁵Ngo gírukna longe kídíem míngkídung. Ngo yétonam dítag yénamem míípa sudung.

⁶Yoh rubungem ngo míngíí míngííla duuto; ngo míngíí sudola agíem íngkísuto:

⁷“RUUTUM bí ngolum mepak ayar yénaya? Bí edílokom ngolukíng ashéng kumayénaya?

⁸Bíkke duuyarna ayangem mepak ayar tonaya? Bíkke pébisunam agomde turyimanaya?

⁹Shédí bí yaasam namem mitpan suto kunaya? Bí marlílok bíkke ayang míípangem melusuto kunaya?”

¹⁰Delo ngo poto, “Ngokke míínyinge isunamde si- Shédí bí ralna Shédípe iyimang.”

¹¹Nokke bottena agér inamem ngo míípang suyéku, RUUTUM; nokke kerape irisinyo inamem ngo míngísuyéku.

¹²Nokke inam takamem ngo míngkíyé; nokke ralnam agér takamem ngo míngííyé.

¹³E Shédía, nokke inam takamde deene, ingkona shédíete nokke kísape bottena kamang.

¹⁴Nomin irisinyo ina Shédíe, angu opín kídílo tolnamem lengkanne.

¹⁵Nokke ralnam kotírlok no nokke amikídíem, Jakobke oo kídí emlang Josephke oo kídíem repíttoku.

¹⁶Edílo asie nom kaatodí, E Shédía bulu pesoto, delokke siyénge dan-geto.

¹⁷Doomuge pedong asiem omoto; talenge doomírem mírmoto; delokke yaarie rego regolok latto.

¹⁸Nokke doomír yaarie tani amongem míraa bomla latkan yéname tani amonge pesuem dan-gela tonto.

¹⁹No asi sigír teyolok gídungai, no aane raadalok koodungai idola nokke lelamem kaapamang.

²⁰No Mosi kelang Aaronke alaglok nokke amikídíem mér bénbam kísape gílen botoku.