Read Alladian MIRILUNGGU 81 Bible Online

MIRILUNGGU 81 - Alladian bible

MIRILUNGGU 81

¹Ngoluke turkeng Shédí kíng miri lulangka; Jakobke Shédí kíng goktoola miri lulangka.

²Miridem lutoka, tatpona kéékungem mantoka, dumdum dem díítoka.

³Poolo si karsing dungem, poolo si yilbodungem, adeng-ape legape bikul tapungem muttoka.

⁴Simin Israel opínke ayone, Jakobke Shédíke ngiitome.

⁵Bíkke Ijipt em langkam aaduem, sim bí Israel amikídílo bito. Ngo sikepe ponam tatkí rumanam agomko tatto:

⁶“Ngo noluke gordung egedem laabínto, noluke elíng tebegem kiiro lokke ngo tuyito.

⁷Adírdula noluke ngom gokkolok ngo nolum laalentoku, doomírlok ngo nolum poyansuto, ngo nolum Meribah siirunglo ikangkíto.

⁸E ngokke amikídía, ngokke pobeng binamem tatgap langka. E Israel kídía, edítko nolu tatgap duamang emla ngo míídune!

⁹Noluke gooralo angu shédí kamayé; nolu angu shédíem kumsumayé.

¹⁰Ngomino nolum Ijipt amolok laalenkuna, noluke RUUTUM Shédíe. Noluke nappangem koya langka, delo ngo mamlíkyé.”

¹¹“Idakkom ngokke ami kídíe ngokke agomem tatgapna kamang; Israelde ngom mínggena kamang.

¹²Dekepe iname bulu agí mínggílok gísudope emla, ngo bulum, edem-eléna aapíem bito.

¹³Ngokke agomem ngokke ami kídíe tatgap biduamang emla, edítko ngo mííyén? Bulu ngok tomlígem tadduamang emla edítko ngo míípene!

¹⁴Ngo buluke miruem menape momapyéku, delokke ngokke alage buluke miru kídíem imínsuyé.

¹⁵Ngom kangkina kídíe pesola ngokke keralo kumsuyéku; bulum ingéénamde duuyaryé.

¹⁶Idakkom ngo nolum airuna gehulok donamem biyé, delokke nolum moonam lokke ngullanglok kiidarmoyé.”