Read Alladian MIRILUNGGU 88 Bible Online

MIRILUNGGU 88 - Alladian bible

MIRILUNGGU 88

¹E RUUTUM ngom turmone, ngom igultoika emla lolope nom kumdung; yumdíke nokke keralo ngo kabbi sudung.

²Ngokke kumnamem tatbika, ngokke igultoika emla kumnamem tatbika!

³Deddína adíre ngokkíng angkai, dekepe ila ngo sinamlo aníndung.

⁴Ngo sita simana ami kídí kísadung, ngokke tolnam ralname gíyinkai.

⁵Simang gooralo mepaknam kísape agolo petla menam simang kísa. Apíípe nokke míípang suyimanam amikídí kísape, kapeila bulum no igulyimang.

⁶No ngom ago goorulo yoplíkto, kaamue jemit iko delokke rumkíyalum amolo melíkto.

⁷Nokke marlíng tebege ngokke teyolo duuto, ngom sipyar rumkílo pulupto.

⁸No ngokke angong kídíem ngom mepakdope rulíkto; bulu ngokkíng aaso dope no bulum ito. Ngo duknyok lamadope ngom sittumla meto;

⁹ngokke amige adírlok yalí yayang idung. E RUUTUM, loodíke ngo nom gokdung; ngok alage lengonla kumsudung.

¹⁰No sinakepe irisinyo idunía? Bulu gerep langkula nom yidgedunía?

¹¹Nokke ooyimana ayangem agolo pobidunía, demangkom nokke míngkengem nyokko amolo pokandunía?

¹²Kaamolo nokke irisinyuem kaapadunía, demangkom mepaknam amolo nokke ainamem pobidunía?

¹³E RUUTUM, nom ngo igultoika emla gokdung; rodíke ngo nom kumdung.

¹⁴E RUUTUM, no kapeila ngom mepak sukane? No kapeila ngom ngépak gekane?

¹⁵Ngokke yaamépe idudelokke ngo kitíla sibomyai; nokke ngom ingéékolok ngokke amíle songgekai.

¹⁶Nokke marbomkolok ngom igípto, nokke dííname ngom miinmoto.

¹⁷Bulu puumu kísape longe rubungem ngom gargong bomdung; bulu ngokkíng aanín yayang idung.

¹⁸No ngokke ngojung kídíemte ngokke lokke mooteng motoku; kaamo petome ngokke angongpe ikai.