Read Alladian MIRILUNGGU 91 Bible Online

MIRILUNGGU 91 - Alladian bible

MIRILUNGGU 91

¹Séko RUUTUM kíng duusigepe gídudí, Tolya yalumnake mopítko gooralo duududí,

²de bím sikepe polayé, “No ngom mopítbone delokke itumbone. Nomin ngokke Shédíe; nokkíng ngo míída sudung.”

³Kénpí sumanam gíímang siimolokke, delokke gérmang pena kinam lokke ngom bí ekerpe mesiiyé.

⁴Bí nom labbínglok taapob bomyé; no bíkke pegoolo turyé; bíkke mínggapde nom mosing isiyé.

⁵Yohlo no lomnam gíínam pesonam kamang, demangkom longem rubom tobomnam lokke pesopenam kamang,

⁶demangkom kaamolo kilii-ramli, demangkom longem nyokpenam lokke pesonam kamang.

⁷Nokke ampenglo éjar amie silado, nokke ampelo jaryingkope gargong lado, idola de nom atí imayé.

⁸Atímana ami kídíem edítko ingéédune dem no agíe kaasuyé.

⁹RUUTUM bím nokke dungkepe duusi sukepe ikolok, Teyong yalumna bí nokke dungkepe ikolok,

¹⁰nokkíng gííma simo kamayé, lomnam gíínam kamayé.

¹¹Kapeila bí bíkke teyong kotoki kídíem nom kaabomdope melíkyé, yéko takamlo nom gakbomyé.

¹²Nokke ale elínglo tunyam sumadope, buluke alaglok nome gakpít bomyé.

¹³No myomur emlang tabíem, pesorunam myomurem, delokke asum aar kana tabíem tujémyé.

¹⁴Shédí bí podung, “Ngom ayana kídíem ngo laasiyé, delokke ngom RUUTUM emla kénna kídíem ngo mopítyé.

¹⁵Edílo bulu ngom gogyédí, ngo bulum tatyé; buluke adírduem ngo bulukíng duumínyé. Ngo bulum laasing mosiiyé delokke mínggeyé.

¹⁶Buluke amanpe ngo bulum oolko turmoyé; ngo bulum kaasiyé.”