Read Alladian MIRILUNGGU 94 Bible Online

MIRILUNGGU 94 - Alladian bible

MIRILUNGGU 94

¹RUUTUM nomin ingééna Shédíe; nokke marlíngem lengkantoika!

²No ami takamem bisarne; gereptola adum-alena kídíem ipenamem itola!

³Edítko atímana kídíe ashépene? RUUTUM edít longekoda?

⁴Edítko ami petna kídíe adum-ale iyén, delokke petnam agérem yidkím suyén?

⁵E RUUTUM, bulu nokke amikídíem iréédung; nokke amikídíem igípdung.

⁶Bulu meyéng emlang, abu kamanem petdung, delokke ngoluke amolo mibope duuna kídíem petpakdung.

⁷Bulu podung, “RUUTUM bí ngolum kaamang; Israelke Shédíe kaasumang.”

⁸Amilokke loobak yalumna kídía, kéndonía! Midekídía, edílo nolu kényéne?

⁹Nyorungem pína Shédí bí tatmayénía? Amigem pína bí kaamape iyénía?

¹⁰Opín kídíem yébona bí bulum ingéé mayénía? Bí ami takamem luyilbone- bí míípe míngor kamanía?

¹¹RUUTUM bí tanie ingkuem míídudí, bí kéndung, buluke ponam agom kídarde agér kamane.

¹²RUUTUM nokke lugapnam delokke ayonem ngiitomnam amide edítko gérdun!

¹³No bím adír longelokke duuno sumodung. Mirul amikídíem umdope deerung koomang tetengem.

¹⁴Kapeila RUUTUM bí agí amiem mepak sumayé;

¹⁵Jonnam ayonem kebang ekumlo paayéku delo deenampe yéna takame dem tolíkyé.

¹⁶Séko ngokke legape atímape agér inem dakka subiyéne? Séko ngokkepe deemang agér ina keralo doobiyéne?

¹⁷RUUTUM bí ngom igul mangamílo, ngo rongngamko amolo menang asak gídak bongai.

¹⁸Ngo mííto, “Ngo olet dakbong,” idakkom E RUUTUM, nokke ooyimana ayange ngom gakreptoku.

¹⁹Edílo ngo ankíem míídír sutítodí, delo no ngom ngiilangkula ashéng motoku.

²⁰Berulok bisarna kídíem, jonmana bedangem jonnape bomrunalo, no gyabbo sugíng kamang.

²¹Bulu deenampe yénakídí lokke yénamem ipakdomílo emla ine, delokke imem kamana amiem petne.

²²Idakkom RUUTUM bí ngokke yapgue, delokke ngokke tamte, duusigekeng Shédíe.

²³Bí bulum buluke atímanam legape ingééyéku, delokke buluke paab legape bulum nyokmoyéku, RUUTUM ngoluke Shédí bí, bulum nyokmoyéku.