Read Alladian NGIITOM SIRUNG 10 Bible Online

NGIITOM SIRUNG 10 - Alladian bible

NGIITOM SIRUNG 10

¹Sikesi Solomonke ngiilu tuuname: Akor kana ue abuem mííyum sumodo; midede anem buulímodo.

²Panggí malok paanam ekurade nom aina agér bimayé, idola tetelok paanamde nokke turnamem mosiidung.

³RUUTUM bí aina amiem keno momayé, idola atímana amiem buluke paape míínamem paamadope idung.

⁴Ríksonamde nom opan modung, idola ríklí namde nom mirem modung.

⁵Kénsuna tanie aliem moodílo gekum sudo; ali gaddíem ipnge sunamde annyingname.

⁶Aina amie utepooro yégedo. Loorímana ami lokke agome mirol séguem mesup sudo.

⁷Aina amiem utepooro kísape míípa sudoku, idola atímana amiem menang asak mitpan sudoku.

⁸Kénsuna tanie aina luyilem torík sudo. Midepe agom ponade nyok suyéku.

⁹Tetena amide edíípe duudung, idakkom imemna amide umkosuyé.

¹⁰Séko aroem mesup sududí, de ebín ipaadung, idola séko jonnampe tatsukolo lududí, de yéponam legape agér ine.

¹¹Aina ami lokke agom kídíde turnamke sirunge, idola atímana ami lokke agom kídíde mirol aapíem leesup sudung.

¹²Kangkinamde ebín lerínge, idakkom ayade imem takamem mepakdung.

¹³Míípe-míngor suna tanie tatkén penam agomem podung, idola kénmana amide ingéé pename.

¹⁴Gyankana tanide paala penam kénnam takamem laadum sudung, idola mide yaoe pomílo ebínem laalík sudung.

¹⁵Kanam remname miremem ipíídung; tong aryange aatí opanem petdung.

¹⁶Ainam agér lokke amande turname, idakkom paabe imemem bojé yayang imodung.

¹⁷Lusi lumonamem tatlína ami kídíde turyé, idola agí imemem togemana ami kídíde nanyiidung.

¹⁸Séko agí nenamem pokom sududí, bí mena tanie. Séko gomon lugoo dudí bí mide.

¹⁹No edítko pobyan suyédí dekeko pomem sudung. Nolu kénsuna tanipe idu mílo tatbumla duuyé.

²⁰Aina ami lokke agom kídarde arem aro kísane; atímana amilok míínamde are kamane.

²¹Aina ami lokke agom kídarde amiem bojéko iguldung, idola mipe-sole kénmang kolok sidung.

²²RUUTUMke ayang igulde nom mirem modung. Nok ríklí lok remya mayé.

²³Imem itíla yénade mide yaoe, budii kana tanie gyanem erap bomdung.

²⁴Yéjina ami kídíde buluke míínamem paadung, idola atímana amide buluke peso yirínamem paayé.

²⁵Gumname aala atímana amiem yabbomdo, idokom jonna amide edíípe doodo.

²⁶Loobakna amiem edílokom nokke legape ibidope tomlík mapeka; de nokke iipalo iikumna kuunape, demangkom amigem uulumna míkkípe idung.

²⁷RUUTUM me ansu langka, delo no turtíyé. Atímana amie situng dorpodung.

²⁸Aina ami kídíke míínam sunamde ashéng kolo gíbodung, idakkom atímana kídíde atíyang mííbommang.

²⁹RUUTUM bí tetena amiem kaabomdung, idola imemna kídíem nyok modung.

³⁰Deenampe yéna amide agínpe edíí sudung, idakkom atímape yéna amide amoso turmayé.

³¹Deenampe yéna amide gyanlok podung, idola atímana amide agínpe míínyi penam agomem podung.

³²Mííjina amie popenamem kénsudung, idola atímana amie polen kíyém míínyi penamem podo.