Read Alladian NGIITOM SIRUNG 13 Bible Online

NGIITOM SIRUNG 13 - Alladian bible

NGIITOM SIRUNG 13

¹Akorkana oo de, abu lusi lumuem tatgapdo, idola adum alena amide, bíkke imemem toge sumang.

²Aina amiem buluke pokorlok amanem bido, idola séko bulu yaddudí bulu díínam monamem erbomdung.

³No ingkuem podudí dem ansulangka, delokke agí yénamem mosing sulangka. Podu-poyu kénsumape pona amie agíem pokat sudung.

⁴Ríksona amie edítko atíem mííbomdudí, bí edílote dem paamayé. Miríína amie bíkke míínam takamem paadung.

⁵Aro tetena amie menamem akdung, atímana ami kídí lokke agom kídíde gomkéye, delokke annyingname.

⁶Aang gejiinamde dengomna amiem mosiido; atímana agérde paabna kídíke oletkue.

⁷Ayokon amie miremna kísape irudung, idola atíkamang. Abíde opanna kísa irudung idola panggíngem paasudung.

⁸Mirem amike abal pitlík pekode agíem itur sulado, idola sékoteng opan amiem irítmang.

⁹Aang gejiina kídíde angune ila asirna kísadung; mirul amikídíde meruem munmitnam kísape idung.

¹⁰Adum ale inamde ebín lerínge. Luyilem matanamde gyan agére.

¹¹No ekurangem somupe paayang paayang idumílo, menang asak dem inyoksuyéku. Edítko no paarampe paadudí, dekeko no bomteyayé.

¹²Mííbom namem inyokmílo, aangemte inyokdo, idola míínamde aromílo nom ashéngem biyé.

¹³No aina luyilem lupak sumílo, ebínem tomlík sudung, dem matamílo no turyé.

¹⁴Gyankana kídíke luyilde turnamke sirunge; nokke yépename nanyi dokom dekede nom igulyé.

¹⁵Míípe míngor suname mínggenamem paamodung, idakkom míída sukan manam kídíde nyokpeko bedalo dung.

¹⁶Ansu kaasuna tanie agínpe buluke agér imang adape míngkí poodung.

¹⁷Mííde manam kotokide ebín ipaadung, idakkom míídenam amide yéponamem langaadung.

¹⁸Kénlímana tanide opanyé, delokke annying suyé. Lusi lumonamem tatgapna tanide mínggenamem paayé.

¹⁹Nokke míínamem paadope inamde edítko aidun! Atí kénmana amie atímalokke míílat tokupe míímang.

²⁰Gyankana amiem angong ilangka delo nokom kényé. Kénmana amiem angong imílo no nyokyé.

²¹Ebíne paab ina amikídí yéko miyonglo yémín gedung; idakkom aang gejiina kídíem aina amanem biyéku.

²²Aina amide oten siirek loope agíke ekurangem mebido; idakkom paabna kídíke ekurange yéjiina amikídílo gíyéku.

²³Pakímanam arík kídíde opan kídíke dopenam legape bojépe aliem lenbiyai, idakkom mirusogong amie dekedem aríkpe imomang.

²⁴Agíke uem irítmamílo no bím ayamang. No bím ayadumílo lusiisuyé.

²⁵Aapí mitena kídíe dopenamem alummape paasudung, idakkom mirul amikídíde agínpe kenola yédung.