Read Alladian NGIITOM SIRUNG 14 Bible Online

NGIITOM SIRUNG 14 - Alladian bible

NGIITOM SIRUNG 14

¹Ekumem nyamne arokídíe írgaamodung, idola mide yaoe nyokmodung.

²Tetepe yélangka delokke nokke RUUTUM me mínggenamem lengkan langka; nokke miru sogope yénamde míngge manamem lengkan sudung.

³Midelokke míngkíme bím bojépe pobyan sumodung; gyankana amilokke agom kídíe bím mosii sudung.

⁴Aal gíbopena rubo kamamílo nokke kumsunge araayé, idola dem kamílo alie bojépe lenyé.

⁵Aro hakiide agínpe tetengem podung, idola menade menamem podung.

⁶Yadna amide edílokom gyankanape ilamang, idakkom míípe míngor suna tanide menape kéndung.

⁷Mide yaoem yébo sumapeka; bulu nolum poyil penam kamang.

⁸Kapeila minyo amie milo arokane? Legade kape ipe aidudí dem bí petom kéndung. Kapeila atí kénmana tanie midekan? Legade bí petom kénsudung emla bí míísudung.

⁹Mide yao kídíe paab idokom, bulu míngge saggemang, idola aina ami kídíe yaasam kosulídung.

¹⁰Nokke ashéde nokkesue; nokke kanííde nokkesue. Sékote delok tarong paamín gemayé.

¹¹Aina amilokke ekumde atímana amilokke ekumem bénpakrongemte duuyé.

¹²Nokke aipe míínam bedade nom sipekolote gíbolado.

¹³Ngilname duuk ankíem pokomdung. Edílo ashénge gídudí, ankí kenue agínpe delo dung.

¹⁴Atímana amie buluke paape sunamem paayé. Aina amiem buluke agérlok amanem biyéku.

¹⁵Mide amie atí takamem arope míídung; kénsuna tanie agí lekorem kaasudung.

¹⁶Gyankana amikídíe ebínlokke ansudung, idola atí kénmana tanie ansu kaasumape menang asak isémdung.

¹⁷Marpona amie ipu silé agéremte idung; milo arona tanie dengepe duudung.

¹⁸Kénmana tanie mide amínem paadung, idakkom minyo amikídíem kénnam amanem bidoku.

¹⁹Atímana amikídíe aang gejiina kídí keralo kumsuyéku, delokke buluke ayangem matayéku.

²⁰Moomemem metobongka, agíke kumríete opan amiem míímang, mirem amie angonge alummape idung.

²¹No ashépe yélídomílo, opanem ayang langka; akonem mepaknamde paabe.

²²No ainam legape agér imílo, amiem edíípe míngkosuyé, delokke míngge kosuyé; no atímanam legape agér imílo de imemdung.

²³Ngiilangka delo no turkengem paasuyé; no ngomtí peela duumílo opanyé.

²⁴Gyankana kídíem ekuralok amanem bido, idakkom mide kídíem mide agérlok kangkéndo.

²⁵Hakiie aroem pomílo amiem popídung; bí menam lumílo amiem lukadung.

²⁶RUUTUM me pesonamde akon emlang bík erangem míídíí sumodung, delokke edíípe duumodung.

²⁷No sinamem gísigepe míídunía? RUUTUM me pesogenamde turnamke sirunge.

²⁸Roja lokke bottenamde edítna amiem bí yébodudí delok idung; bulum mela bí yélasumang.

²⁹Dengepe duudumílo no milo arodung, idola marpodumílo no agíke mipe solem lengkan sudung.

³⁰Dengom aapíe aimodung, nesu aapíde kénsar kinam kísadung.

³¹No aatí opanem iréémílo, pílenna Shédíme ipu silédung; idola opanem ayangnamde kumsunam agére.

³²Mirul amikídíde buluke atímana agérsulok nyoknamem langaa sudung, idakkom aina amie buluke ami-aro agérlok mosiidung.

³³Gyande minyo ami mííyi míísang tabulo dung; mide kídíde míípe míngor atírung kénmang.

³⁴Aang gejiinamde opínem botte modung; paabde opín konem annyingmone.

³⁵Rojakídíe agíke kénna migom kídíem mííyum sudo, idakkom iramna kídíem bulu ingéédo.