Read Alladian NGIITOM SIRUNG 15 Bible Online

NGIITOM SIRUNG 15 - Alladian bible

NGIITOM SIRUNG 15

¹Remakpe poyan suname marlíngem remak modungku, idola tolnam agome utsamodung.

²Gyankana amie edílo poyédí, bulu kénnamlok tatpope podung, idola kénmana amie gomké lusémdung.

³RUUTUM bí rego mipílo kape idudí dem kaadung; bí aina teyololang atímana teyolo kanggap bomdung.

⁴Remakna agome turnamem langaado, idakkom kaníína agome nokke aidem nyokmodo.

⁵Nokke abuke luyildem mepaknamde mide agére; bíkke luyilem toríksunamde ami aro name.

⁶Aang gejiina ami kídíde buluke ekurangem mesiido, idola loorímana ami kídíe bulukem tíílíng keno moodílo inyoksudo.

⁷Gyankana amie kénnamem goobyakmodo, de mide amilok lenmang.

⁸RUUTUM bí aina ami kídí lokke kumnamem ashédung, idakkom atímana ami kídíke arbi babinamem kangkidung.

⁹RUUTUM bí atímana ami kídíke yékorem kangkidung, idakkom ainem inakídíem ayadung.

¹⁰No imemem idumílo, nom ingéé sékréyé; no agíem ijonkosu mamílo no siyé.

¹¹Uyu amongekom delo kape idudí, dem RUUTUM me kénmomape ilamang; demílo kape kísa tanie Shédí kelokke agí míínamem mesup sulayéne?

¹²Míngkímsuna amie agíem ijon kosutope emla míímang; bulu bulum kényana kídílok luyilnamem edílote matamang.

¹³Ami kídíe edílo ashéyédí, bulu ngildo; idola edílo buuyédí, míídír míísong dope kaadung.

¹⁴Minyo amie kénlídung, idakkom bopol amie deperung yénamem aipe míídung.

¹⁵Aatí opan yénamde mínga ingasula yébunge, idakkom ashéna amikídíde yénamem agínpe yépope yédung.

¹⁶Miremdola adírpe yénam dempemílo, opandola RUUTUM me pesola yénamde aiyaname.

¹⁷Domíem bidola kangkinadem pemílo, oyingem bidola ayana kídíde aiyadung.

¹⁸Marpode adum ale ipaadung, idola hakjémde yépoem laalíkdung.

¹⁹No loobak dumílo, rego mipílo yényi yésuem paayé, idola tetemílo no adír paamayé.

²⁰Gyankana ue agí abuem ashéng modung. Mide amiemin agí anem mepak sudune.

²¹Mipe sole amikídíe agí mipe solelo ashépe míírí sudung, idola gyankanade ainem iyé.

²²No edítko paklayédí takamke luyilem laadum sutoka, delo no ipííyé, dekepe imamílo no iramyé.

²³Míídopagem aro agomem paanamde edítko ashéname.

²⁴Mííjina ami kídíde turyar pekolo gílíkna teyong bedalok gído. Sipekolok gílíkna rumkíng bedalokmang.

²⁵RUUTUM bí adum alena ekum erangem nyokmoyé, idola bí meyéng sérangem mosiiyé.

²⁶RUUTUM bí atímana mííyi míísangem belumdung, idakkom daadééna agomem bí mííbado.

²⁷Mirusogong aapí gedola paapekpe emla míímílo, no nokke ekum erangem adír ipaabodung. No bisup sunamem laamapeka, delo no turteyé.

²⁸Aina ami kídíde poyan sumangadape míngkí podung. Atímana amide menang asak luyansudung, idola de ebín lupadung.

²⁹Edílo aina amie kumyédí RUUTUM bí tatbidung, idakkom atímana ami kídí kem tatgemang.

³⁰Daadéé mingmue nom ashémodo, delokke tatpona dooyinge nom míípo moyadung.

³¹Nom lusi lumonamem no tatgap dumílo, no milo arodung.

³²Kénpenamem lupak sudumílo, no agíem atímape isudung. Lujon ijonem torík sudumílo, no ami aro yayang iyé.

³³RUUTUM me peso genamde nokkepe kénpekue. No míngge namem paadope míímílo kerape amépe míísupe aido.