Read Alladian NGIITOM SIRUNG 16 Bible Online

NGIITOM SIRUNG 16 - Alladian bible

NGIITOM SIRUNG 16

¹Ngolu atí takamem míírung irung lado, idola luyin agomde Shédí kelo dung.

²Nokke inam takamde aidung emla no míísulado, idakkom Shédí bí nokke mííbomnamem bisardung.

³Nokke mííbomnam agérem lubéélíkdope RUUTUM me kolangka, delo dekedem nom ipíímoyé.

⁴RUUTUM bí pínam takam gípekuem iruutung; delokke mirul amike gípekode nyokpekue.

⁵RUUTUM bí adum alena takamem kangkidung; bí bulum ingéédídem edílokom gísi gemomayé.

⁶Edíípe míídasula, míngke sulangka, delo Shédí bí nokke paabem mesambiyé. RUUTUM me mínggelangka, delo atímane nokkíng aamayé.

⁷No RUUTUM me ashéng momílo, nokke miruem no angongpe batmo ladoku.

⁸Anyongo dokom, tetelok paanamde menamlok bojépe paanam empemílo aiyado.

⁹No ipenamem míírung irung lado, idola Shédímin nokke bedangem sutlíkdune.

¹⁰Rojade teyongke ralnamlok podung; bíkke luyin namde agínpe aidung.

¹¹RUUTUM bí kíkí bekkínamem, delokke pesi koret inam tabungem kampope inamdem míídung.

¹²Rojakídíe atímanem kaalamang, kapeila jonnam demin sorkariem edíímodune.

¹³Roje aroem tallídung, delokke dem ponakídí dem aabosudung.

¹⁴Gyankana amide rojem ashéng moperung emla iyé; roje marmílo, akone nyokladung.

¹⁵Rojake aabo sunamde dongguplo pedong omona doomug kísadung, turname delo aadung.

¹⁶Uun, delokke baldín kanam empenem gyan delang kénnamde kereyadung.

¹⁷Aina ami kídíde atímanem mepakna bedalok gídung; depeila nokke gípekuem ansulangka, de nokke turnamem mosiilado.

¹⁸Míngkím suname nyokpekolo, delokke adum ale inamde olet pekolo gíbodung.

¹⁹Adum ale idola kuruknam ekurangem orsunamem pemílo, amépe míísudola opanpe duunamde aiyadung.

²⁰Nom luyilnamem tatgap langka, delo no ipííyé. RUUTUM kíng míída sulangka delo no ashéyé.

²¹Míítet kéntetna amide, ami aronade bíkke tatkén namlok amín kadung. Bíkke agomde edítko tatpodudí dekeko poji yayang idung.

²²Gyande ami aroke turnam lerínge, idakkom atí kénmana amiem kénmope inamde ingesudung.

²³Míípe míngorsuna kídíe buluke pomang adape míngkí supodung, delo buluke ponamde tatbayadung.

²⁴Buluke tatpona agome yakkíyém tiiname, delokke amílem aigemona ngullang kísadung.

²⁵Nokke aido emla míínam bedade sipekolo gílík ladung.

²⁶Agér ina amilok dotade bím agérem iduk moyadung, kapeila bí agíke kenuem ibíísupe míídung.

²⁷Aimana amikídíe amiem atímape inamem matadung; buluke agom kídar dete atímana mílíe.

²⁸Loorímana amikídíe lugem pobyakdungku; ebínem bulu yébomdung, delokke angongemte mepak sudungku.

²⁹Díína-mona amikídíe buluke angong kídíem yaddo, delokke nanyingkolo gíbodo.

³⁰Mikkír nyokírna, delokke koyin kotana amikídídem ansulangka; bulu atímana atíko mííbomdung.

³¹Turtenamde aang gejiina kídíke amane; dumpunamde erkí genam dumlupsue.

³²Ralnamrupe míísupenam dempemílo, hakjém namde aiyado. Taon tabungem ruutum bomnam empemílo, agíe aapíem mosii supoonamde aiyado.

³³Amikídíe Shédíke míínamem kénpe emla líímé modung, idakkom Shédí bí dem poyan supenamem míírusudung.