Read Alladian NGIITOM SIRUNG 18 Bible Online

NGIITOM SIRUNG 18 - Alladian bible

NGIITOM SIRUNG 18

¹Amiem angong ikímana ami kídíde agí petomem erap sudung; takame aipe míínam atídem bulu tolíkmayé.

²Midede atíem tatkén dungadí tatkén mangadí dem ankímang; bíkke ipe emla míínamde agíke midem lengkan sunamde.

³Paab delang annyingde leko bosudung. Nokke mínggenam amínem menyok sukílangka, delo no lukangem paasuyé.

⁴Ami akon lokke agom kídíde siyéng asi eerína kísape, gyan sirung asi biilenna kísadung.

⁵Imemem aabosudola deesunem aro tetengem paamomape inamde aimang.

⁶Edílo midede aklendudí, delo luakla agíem demkosudung.

⁷Edílo midede podudí, agísuem bí ponyok sudung, agíke pomemko agomlo batko sudungku.

⁸Lugenamsi tatporunge idung, edítko ngolu dem tarapdun.

⁹Ríksona amide nyokmona tani kísape atírumane.

¹⁰RUUTUM bí edííruna duusi sukenge, delo yéjina kídíe gíla edíípe duusi sudung.

¹¹Mirem amikídíe idokom, buluke kanam remnamdem, taonem kedon yana edíína torgosunam etor kísape míísudung

¹²Amépe míísumanadem sékote mínggemayé; adum alena ami kídíe nyokpeko bedalok gídung.

¹³Poyan sumang adape tatgap poolangka, depe imamílo no atí kénmanape idung, delokke ipu silédung.

¹⁴Nokke kidungem turperung emla mínggap namde nom umbomyé, idola no dem melu sumílo nokke míínam sunamde nyokdo.

¹⁵Minyo kídíde agínpe míílídung, delokke kénperung míídung.

¹⁶No bottena amiko ríksu líídonía? Bím amanko bombitoka, delokke de ipoyé.

¹⁷Kebang gooralo kebang imínsunam opéé akonlok íngkí bengkíla poyan sumang adape, kebang gooralo kerape pongun gena agomdem agínpe tatbaape tatdung.

¹⁸Kénna midum annyiko kebang gooralo lukísula luram bosumílo, dem lotori sonamlok legangem iyin bilado.

¹⁹Nokke bíruem igul langka, delo edíína taon yapgo kísape bí nom dakkapyé, idola no bím lumín sumílo bí nom eyabem siyya biyimayé.

²⁰Akonke nappang lukorlok akonem míípo modung, nabbéllok bím mííyum sumodung.

²¹Nokke agomlok nok turnamem mosiilado, demangkom nyokmolado; delok legape nokke agomlok ayém torík superung aido.

²²Méngko paanamde aina atíko paadung; si RUUTUMke nom mííbanamem lengkanname.

²³Edílo aatí opane podudí, bí rogula remakpe podung; idola edílo mireme poyan suyédí bík agome toldung.

²⁴Ayokon angong iname duteemang, idola ayokon angonge bíroem pemílo arope mííbo suyadung.