Read Alladian NGIITOM SIRUNG 19 Bible Online

NGIITOM SIRUNG 19 - Alladian bible

NGIITOM SIRUNG 19

¹Mena yadna, delokke midepe yépenam dempemílo, aatí opanpe, delokke tetepe yénamde aiyado.

²Kénmape ernamde aimang; hakjém gemanamde nom adírmoyé.

³Ayokon amie agí loorímalok agísuem inyoksudung, igeyéla RUUTUM me paklo dungku.

⁴Mirem ami kídíde agínpe angongem alummape paadung; idakkom opande angong atel annyiemte menyok sudungku.

⁵No kebang gooralo menam lumílo ingéé kosuyé, delo no duggepeko kamang.

⁶Takame amínkana ami kídíke aabosunamem paaduamang emla míídung; aabosuna kídíem takame ajon jonlídung.

⁷Aatí opanlokke bíro kídíete bím míímang; bí angong koteng kamang. Bí deddíko ralbom dokom atelkote ponom lamang.

⁸No agíem mííré subomdola edítko paklayédí iyil kaayil sutoka, delo nokke kaayil tatyil sunamdem mínggap gelangka, delo no edííyé.

⁹Kebang gooralo menam lunade sékote, ingéé penam lokke duksi gelamayé; bí nyokyé.

¹⁰Mide amie kanam remnampe yépe aimang; delokke abílde bottena amín gebope aimang.

¹¹No kénsunakomílo, nokke buulí marlíngem itumsuyé. Akone nom imemyém, dem mepaknamde botterupe mííjíng ijiinam agére.

¹²Roja lokke marlíde myomur uknam kísadung, idakkom bíkke ayangde pedong obal kísadung.

¹³Atí kénmana oo de abuem nyokpekolo iyok líkladung. Luyarna méngde asi rímyarna kísadung.

¹⁴Tanie ekum emlang ane abuke ekuserangem bomyon suladung; idola RUUTUM bí petom ardana méngdem biladung.

¹⁵No loobakpe míídomílo loobaktoka, iptítoka; idakkom no kenoyé.

¹⁶Shédíke ayonem bomgap langka delo no turteyé; no dem mepakmílo siyé.

¹⁷Nok aatí opanem ayala binamde RUUTUM me bipoonam kísadung, delokke RUUTUM bí nom biyansuyéku.

¹⁸Nokke ome-uem amé dungadape ijonlangka. No depe imamílo bulum inyok sumodung.

¹⁹Akone marpo ipoyémílo, bím delokke aduem paasu molangka; no leko bím ebínlokke igulmílo, lekoteng dekepe ikupe aiyé.

²⁰No luyilem tatgapla, delokke kénlí dumílo, longeko gyankana amipe iyé.

²¹Amie atí takamem ipe emla ruulado, idola RUUTUM ke míínamlok dem iyé.

²²Kaabonamde annying name, mena taniem pemílo opan amide aiyang.

²³RUUTUM me míngge langka, delo no turteyé, duupope duuyé, delokke yényi yéso kamayé.

²⁴Ayokon amie agíke nappalo lengam supenamemte loobak adírpe míídung.

²⁵Adum alenem ingéépe aido, demílomin aiyapena atíem kénmana amie kaayil suyéne. No ami aromílo, nom ijonkolok kényé.

²⁶Peso annying mana amiemin agí abuem iréésula, demangkom agí anem ekumlokke monpaksula idune.

²⁷Ue, edílo no iyil sumayédí, menape nokke kénnam anyongemte no menyoksuyéku.

²⁸Hakiie edílo akonem aklíyédí, delo aro bisar kamang. Mirul ami kídíde atímanem ikílídung.

²⁹Lupe lulena bopolde díngko moko suyérung.