Read Alladian NGIITOM SIRUNG 20 Bible Online

NGIITOM SIRUNG 20 - Alladian bible

NGIITOM SIRUNG 20

¹Bojépe tííban sunamde nom tayyémpe ngommodung, delokke mipe solemodung. Tíngír sunamde atírumaname.

²No myomur uknamem pesonam kísape roje maryém peso langka; bím marmonamde agíem petsuname.

³Mide amie lumín susémdung; buluke lokke mootenamde míngge rupename.

⁴Aal gídí paklo gímana loobakna amide yikkupenam atí paamayé.

⁵Ami akon lokke mííname eerípe koonam deerung asi kísadung; idola kénnakone dem budiilok laalen ladung.

⁶Mipile bíkke edíínam emlang míngkengem pogoosudung; idola bí kapepak nakodí dem ankí kangkítoka.

⁷Jonna delokke aroem ina abu kana ome-oo kídíde gérne.

⁸Roje bisar notkolo duudung, delokke kaamílo atímanem kangkén sémdung.

⁹Séko ngok aapíe berokdung, delo paabe essangkaku emla polayén?

¹⁰Tetepe kíkí bekkímana kídídem RUUTUM bí belumdung.

¹¹Ojing eteng bíkke beleng akorlok bí kapenakodí dem lengkansudo, bí dengom nakodí delokke ainakodí dem no polayé.

¹²RUUTUM bí ngolum kaanana amigem, delokke tatnana nyorungem bitung.

¹³No agér idíem iptíla duumílo, opanyé. Ngiilangka delo nokke dopename bojépe lenyé.

¹⁴Atí rene agínpe atí areem lubonge emla akdung, idakkom bí gíkur dolangkula, lumapla renamdem kekímrupe míísu dungku.

¹⁵No ingkuem podudí dem kénsumílo, de uun tadogem pemílo are kayana atípe idung.

¹⁶Kénkímanam ami lokke ajéngem dorbipe emla togesunake ekurang dem dornana isaplo sanlíkto.

¹⁷Nokke paabang mangkolok paanam atídem no doporuna dotkéyem donalado, idakkom lekorung de nappalo sulli dunkapnam kísape iyéku.

¹⁸Aina luyilem bomtoka delo no ipííyé; atí míírung irung sumape mimak enpe míímapeka.

¹⁹Gomone edílokom agomem mesup momang; bojépe ngomban suna amilo yébo sumapeka.

²⁰Nokke ane abuem no béésumílo, nokke turnamde ruruk aralo meru mitnam kísape nyokyé.

²¹No edítko ekurangem paapope paadudí, de nom deddíko agér bimayé.

²²No agísue atímanem edo rayansupe emla míímapeka. RUUTUM me míída sulangka, delo bí dem ijonyéku.

²³RUUTUM bí menamlok kíkínem, delokke bekkínem kangkidung.

²⁴RUUTUM bí ngoluke bedangem ruubitung; demílo kape kísa amide agíke yépeko bedang gítíngem kénsuyéne?

²⁵Nokke Shédíkepe amanko topek subimang adape kerape aipakpe míngkí poolangka. No méélamlo bursukupelo.

²⁶Gyan kana roje séko imemdudí dem malendung, delokke bím ayang kayimape ingééyé.

²⁷RUUTUM bí ngolum aapí emlang míínanem bitung; ngolu agísue agísulok rusi sulamang.

²⁸Rojade tetelok, arolok, delokke kampolok amiem yébo ayarnade duutedung, delokke edíídung.

²⁹Ngolu yaamélok ralnamem míílíkdung, delokke dumpu gena mijingem mínggedung.

³⁰Lekon lekonem adír pangkolok ngoluke yékor séguem angumodoku.