Read Alladian NGIITOM SIRUNG 22 Bible Online

NGIITOM SIRUNG 22 - Alladian bible

NGIITOM SIRUNG 22

¹Aina amín, delokke botterupe kanam remnam annyi arasok akonem no tope míídumílo, aina amín kanamem tolangka.

²Miremekom opanekom sim akampe kadung: bínyim RUUTUM bí pílento.

³Kénsuna tanie ebín píípenamem kaasula dem mepakdung; idakkom míngíímana amie delo gíbut sulíkdung, delokke méélamlo bursu dungku.

⁴RUUTUMke agomem tatlangka, remak langka, delo no miremyé, amín kayé, delokke turteyé.

⁵No agíke turnamem ayadumílo, miru kídíke etkulok batpeko agodem ansulangka.

⁶Kooe kape yépe aidodí dem luyil langka, delo bí dem agínpe simang tetengem míípang suyaryé.

⁷Aatí opande mirem amike abíle. Narmílo no narke delokke abílpe iyé.

⁸No mirusogong aliem leyémílo, ankí kenue lenyé, delokke nokke akonem irééname nyokyéku,

⁹Bigotmape nokke dotkéyem opan kídíem orsulangka. Delok legape no lubééyem paayé.

¹⁰Agíem bottepe míísuna amiem mepaktoka, delo no akkí lukí, lumín manmín, demangkom amín mínpena kaimayé.

¹¹No aapí deenamem, delokke ayang agomem mííjing pojing dumílo, rojade nokke angongpe iyé.

¹²Menamem tolíkmape, idola aroem bomnadem RUUTUM bí míídung.

¹³Loobakna amie ekumlo duudo; luyulo gínamdem bí situm simyo ríksupelo emla pesodo.

¹⁴Abír ajon inamde egum akame, RUUTUM ke marlínam ami kídíem si batdung.

¹⁵Koo kídíe akor kamape ruldo, de idísue, idola dem demtek tomílo aina belengem leedoku.

¹⁶No mirem amiem aman bila, demangkom mirem pesola opanem iréémílo, no agísue opanyéku.

¹⁷Tatgaptola gyankana kídíke agomem ngo nom poyiltoso. Buluke poyilem pori rigapkítoka,

¹⁸delokke dekedem míípang sukumílo no ashéyé, delokke dekedem apíípe laalíklayé.

¹⁹Ngo nom RUUTUM kíng míída suyépe emla míídung; dekepe ila ngo dekedem nom supak pobiyé.

²⁰Ngo nokkepe ngiilu tuunameke íying angumko atla mebitung. Dekede kénnam elang aina luyile kadung,

²¹delokke arode ingkuedí dem ngo nom poyilyé. Delo edílo dem malen dope nom melíkyédí, delo no aipe poyan supenam agomem paayé.

²²Opanem no ilado emla míílo mapeka, demangkom mitum amiem kebang gooralo dakguna kamang emla míílo mapeka.

²³RUUTUM bí buluke legangem pogeboyé, delokke bulum lurít porítnem bí turmomayé.

²⁴Díílí molína, marpo ipona amiem angong imapeka.

²⁵No buluke ledulok gímemsula míílat suyimape ipelo.

²⁶Akonke ajéngem dorbipe emla togesumem mapeka.

²⁷No dorlang kumamílo, bulu nokke ippuemte joobínyé.

²⁸Noluke buku nekuke rísu lípangem ie-sikur mapeka.

²⁹Aina agér ina amiko ngom lengkantoka, delo ngo roja kídíke gairuna angong kídíemte aiyana amiko nom lengkanyé.