Read Alladian NGIITOM SIRUNG 24 Bible Online

NGIITOM SIRUNG 24 - Alladian bible

NGIITOM SIRUNG 24

¹Atímana amiem nesu mapeka, delokke bulum angong ipete imapeka.

²Ebín ibodope míítínamde buluke agérsue; akonem ingéé penam kuasai emla bulu kaatí bomne.

³Ekumem gyan loklang kénnam lok modo.

⁴Ingkolo kénname kadudí, delo ekum eranglo kampo-tanmona atíe kado.

⁵Gyanlok yénamde tolnam empemílo aiyadung; arope kénnamde tolnam empemílo moyék yaname.

⁶Depekom nokke mimak imang adape, no aipakpe míírung irusupe aido, delokke aina luyilem edítko paayédí, dekeko no ikumlado.

⁷Atí kénmana amide eerípe ponam agomem tatkén lamang. Eerína lupoem pokolo atírung pomín gekénmang.

⁸No agínpe atímanem ipe emla míítímílo, no ebín itíbona amínem geyé.

⁹Mide amilokke míílen sunam atode paab mílíe, amiem luyé lulééna amiem amie kangkidung.

¹⁰Tapét paklo no mekem dumílo arope no ralmanako.

¹¹Igíírumape pansaadope inam amiem, mosing gotkue emla mínge míílang sumapeka.

¹²De nok agérmang emla no míílado, idola Shédí bí kéndung, delokke nok míínamem bisardung. Bí nom kanggap bomdung, delokke kéndung. Delokke nokke agér ikorlok nom amanem bí biyé.

¹³Ue, tangut atiiem dolangka; de aine. Tangut atii lokke alangde nokke ayolo tiiname patdung,

¹⁴delokke kísape gyande aid legape aine emla no beroklado; kénnamem paalangka, delo no yépenamlo angunem paayé.

¹⁵Mirul ami kídíke tetena ami ekurangem langkamla, demangkom bíkke ekumem rotbínla inam kísape imapeka.

¹⁶Tetena amide leko olet dokom, leko bí gerep yékuteteng; idakkom gííma siimoe mirul amiem nyokmodung.

¹⁷Nokke miruke gííma namem kaala ashéng mapeka, delokke bíkke tupsuyém no ermapeka.

¹⁸No dem ngilkamílo, RUUTUM bí kényé, delokke bí depe inamem aipe míímang; delo bím ingéémapete iyé.

¹⁹No miruem míínying kosumapeka, bulum kangkipete mapeka.

²⁰Mirul amie méélam yépenam kaimang, kaato mííto subom namkote kaimang.

²¹Ngokke ua, RUUTUM me pesolangka, delokke rojem mínggelangka. Bulum akpésuna kídíem atí ibo sumapeka;

²²sikena amie letellok nyokla dungku. Shédí bí, demangkom roje gíímadope ilado, dem no kénsudonía?

²³Gyankana amikídíe sikesimte potungai. Aapí píruko gedola bisar namde ipemaname.

²⁴Imemna amiem ajéng kamadope lusékmílo, bí ami takamem béngkosuyé, delokke kangki kosuyé.

²⁵Idola imemna amiem ingéédope bisarna amide jéyé, delokke aina amínem geyé.

²⁶Tetepe poyan sunamde aro jonbosunam kangkenge.

²⁷Nokke aríge kadung emla míímangem, delokke yékengem paasuyé emla berokmangem, nokke ekumem mola dungkeng dakkeng ilíkmapeka.

²⁸Atí legang kamape akonem aknam hakii bimapeka, delokke nokke nabbél lok menam-yadnam lumapeka.

²⁹Sikepe lumapeka, “Bíkke ngom inam kísa pakpe ngo bím iyansuyéku. Ngo bíkke ngom inamem doryan suyéku!”

³⁰Ngo loobakna, atí kénmana amilokke arík raadalok gíto.

³¹Delo taanyum tatké mílí, delokke íínge alempe ido. Arík língkum etorde bénké bényéla ido.

³²Ngo dem kaato, míngkíto, delokke delok agomko kénto.

³³No ippemílo ippotola. Lakyétsula duupotola.

³⁴Idakkom nokke ipdungem tong aryange dokait kísape ruabomyé.