Read Alladian NGIITOM SIRUNG 25 Bible Online

NGIITOM SIRUNG 25 - Alladian bible

NGIITOM SIRUNG 25

¹Sikesi Solomonke ngiilu tuuname, Judah amilokke Roja Hejekiahke kebang ekumlo ami kídíke atyon sula mename.

²Shédíke eerína agom legape sim ngolu mínggedung. Ngolu roja kídíke pomík binam legape bulum mínggedung.

³Roje ingkuem míídudí no kénlamang; bíkke míídoode ngoluke míínamem mííboola, taleng kedon kísa, demangkom siyéng eene eerína kísadung.

⁴Agí aromana atíem baldín lokke ilenlangka, delokke atí píjine delok kampona atíko pílendung.

⁵Atímape luyilna amikídíem rojakelok lenggétoka, delokke bíkke sorkarie jonnam legalok amín kayé.

⁶No roja keralo dagayém mííbayépe emla bottena amipe irumapeka.

⁷Nom bottena dungkollo duudope lulík kosunamde, akonem ngétge bidope lupak namdem pemílo aiyado.

⁸Atíko kaato emla no menang asak kebang ibom mapeka. Pénsam amikone nokkedem mename emkumílo delo no kape iyékun?

⁹Nolang nokke kumríe akpé sunamko kayémílo, nonyike aralo iyin sulangka, delo arang agomem lenmo mapeka.

¹⁰Demamílo no arang agomem aapílo gemanako emla takame kényé, delo no annyinge molayimape iyé.

¹¹Míídongem aipakpe pobinamde, baldínlo uun pílíknam kísadung.

¹²Uun lakkap demangkom gai yalumna uun tadok empemílo kényinsuna amilokke lugapnamem tallípe míínamde are kayane.

¹³Míídíínam kotokide aam yikdo kolo guyém asi tíílíduem ansiina asi tíínam kísa míílík líkkepe idung.

¹⁴Atíem bipe emla pébisudola bimana ami kídíde pedong omomana doomug asar kísadung.

¹⁵Dengepe pogunamde tolnamrupe lutumsuna emte ponudo, delokke amo ruutum emte ponomdo.

¹⁶Dotengko dorongem tangut atiiem no doban sumapeka; deddípe doban sumílo no abat batpeke.

¹⁷Nokke kumrílo yagope gítímapeka; bí nom ayémpe mííla kangki layyéku.

¹⁸Menam lok ajéng luketnamde petna monana, yoksa, singgil, demangkom namjona epuk kísadung.

¹⁹Míídírduem míídíímanam amilo míídasunamde iipang enílnalok jamnam, demangkom lebetna alelok gíkípe inam kísadung.

²⁰Míídírsuna amilo miri lubinamde ansiiduem egem langkutnam kísa, demangkom tarílo alo pitlíknam kísadung.

²¹Nokke mirue kenodumílo, bím donam bitoka; bí tíílí dumílo, bím tíípenamem bilangka.

²²No bím annyingsue imoyé, delo RUUTUM bí nom amanem biyéku.

²³Línggíng asare pedong omonam kísa, lugenamde marlímodung.

²⁴Géétína méngem ekum aralo duubo supemílo ekap teyolo dungge namde aiyadung.

²⁵Pítíle ila nokke asi tíílíduem reyiina asiem tíínam kísa mootelok tatpona kobor tatnamde idung.

²⁶Aina amie atímanalo olík namde, nom deemana sirungem, demangkom deerung asi díknem míípang sumodungku.

²⁷Ngullangem deddípe tíínamde aimang, delok kísape bojépe yidnamem paape míínamdete aimang.

²⁸No nokke marlíngem míímap sulamamílo, mibo mirue mimak aabomyém yapgo kote kamana taon kísape iyé.