Read Alladian NGIITOM SIRUNG 3 Bible Online

NGIITOM SIRUNG 3 - Alladian bible

NGIITOM SIRUNG 3

¹Ngokke ua, ngokke luyilem mitpan sumapeka. Ngokke políknam agérem agínpe iyar gelangka.

²Ngokke luyile nom angun abépe yéteemoyé.

³Míída sunam, delokke míngke sunamem gínyok momapeka. Dekedem alínglo tuge langka, dekedem aapílo atla melangka.

⁴No sim igemílo, Shédí lang tanie nom ashépe mííyé.

⁵Shédíme nokke aapí aang tabulok míída sulangka. Nokke kénnampe míísunamlo míída sumapeka.

⁶Nokke belengyé tabungem RUUTUM me míípang sulangka, delo nom bedang ainem bí tomlíkyé.

⁷No agíe edítko kéndudí dem kényanape míísu mapeka; RUUTUM petomem peso langka, delokke imem mapeka.

⁸No depe imílo, de aina kuséréng kone, nokke taríem géémokune, delokke nokke kinamem remak mokune.

⁹Nokke ekuranglok, delokke among lok nokke ngiilennam takam alilokke len-geyalumna ayékídílok bila, RUUTUM me míngge langka.

¹⁰No dekepe imílo, nokke kumsung alie bíísétyé, delokke nokke onggur alie mesii pename deddíko iyé.

¹¹RUUTUM bí nom ijonyém, ngokke ua, kén-gap sulangka, delokke dem kénsu yépe iname emla míílangka.

¹²Abue agíke mííba sunam uem ijonnam kísape, RUUTUM kom bíkke ayanam kídíem ijondung.

¹³Gyanlok milo arona amide gérne, delokke tatkén lanadete gérne.

¹⁴Arem tadogemte so laabe kayadung; si uun empe mílo are kayadung.

¹⁵Míípe-míngor si, tai tadok empe mílo are kayadung; nokke míínam atí takamem so lupe sulamang.

¹⁶Gyane nom turteng namemlang jénam remnamem bidung.

¹⁷Gyane nokke yénamem yéngam mola mínge sumape yémodung.

¹⁸Séko bulu milo arodudí, bulu ashépe yédung; gyane bulum turnamem bidung.

¹⁹RUUTUM bí amosim gyanlok píto; bíkke kénnamlok talengem bí dungkollo píketto.

²⁰Bíkke gyane asi korongem bítmoto, delokke amoso pedong odope doomugem píto.

²¹Ngokke ua, gyan aapí emlang kénnamem bomgap langka. Dekedem nokke lokke ngétge mokumapeka.

²²Dekede nom turnamem, yéponamem, delokke ashénam turnamem biyé.

²³No agí bedalo gíesumape gílayé, delokke edílokom tupsupete mayé.

²⁴Nokke ippulo ketyém no peso atí kamayé, delokke no ippope yoh rubungem ipyé.

²⁵Atímana ami kídílo menang asak gumnam kísape aana, gíínam lomnam legape míítí penam kamayé.

²⁶RUUTUM bí nom edíípe meyé. Bí nom egumem batmomayé.

²⁷No pakla yémílo, pííram sémona kídíem aina agérem ibilangka.

²⁸Nok supakke igul lanam kumríem edílokom, “Nyampo toyalangka,” emmapeka.

²⁹Nokke kumríem míínyi mopena atíem mííbom mapeka; bí nokke kumríe, nom míída sudung.

³⁰Nom atímape ikímana amiem, akgíng kamape akmín sumapeka.

³¹Díína mona amiem míngki mapeka, demangkom agí mínggípe belena amiem kangge sumapeka,

³²kapeila RUUTUM bí atímape agér ina amiem kangkidung, idola mííjina amiemdan agíke míngkepe medung.

³³RUUTUM bí loorímana ami ekum erangem béélík dung, idola yéjiina ekum erangem lubéé líkdung.

³⁴Mipe sole amide bíkkepe agérlo aamang, idola eetet dengomna amide mínggerunam amínem paayé,

³⁵Kénna amide mínggenamem paayé, idola kénmana ami kídíde agíe annyingem laatem sulíkyé.