Read Alladian NGIITOM SIRUNG 30 Bible Online

NGIITOM SIRUNG 30 - Alladian bible

NGIITOM SIRUNG 30

¹Sikesi Jakeh ke oo Agurke sépekna agom kídíe: “Shédí bí ngokkíng duumang. Shédí bí ngokkíng yémang, delokke ngom igulpena kamang.

²“Ngo tanipe ipenamem pemílo simon kísape iyaadung; tanike kénsunam kísape ngo kénsumang.

³“Ngo edílote gyan kénmang, delokke ngo Shédíke legangem atírung kénmang.

⁴“Séko teyong yéta kénnamem kényinnako kadun? Séko asarem alaglok umkítone? Demangkom egelo asiem gasumpe sumkítone? Demangkom amosokke rísuem díngkítun? Bí sékoí? No kéndonía? Séko bíkke oo de?

⁵“Shédí bí bíkke pébisunamem bomgapdung. Bíkkíng duusigepe matana kídí keepe bí tamte.

⁶Bíkke ponamem no pomang emmílo, bí nom ingééyé, delokke no menako emnamdem lengkanyé.”

⁷Shédí nom ngo kodung, ngokke simang adape atí annyiko ngom bika:

⁸Ngom menam lokke megentoika, delokke ngom mirem petemang, delokke opan petemang imoika. Dekepe iname ngom dopepak namem bika.

⁹Ngo bojépe kamílo, ngo nom míímang empelo. Idola ngo opanmílo, pyoola Shédíme ibuupelo.

¹⁰Béérange edílokom agí ruutumem lukaasupe aimang. Depe imílo béngkosuyé, delokke adíryé.

¹¹Amie agí abuem béésuneke kadung, delokke agí anem yidgemang.

¹²Deemape igeyéla agíem deenamrupe míísuna amieke kadung.

¹³Agíem airunape míísuneke kadung, edítko bulu agíem airunape míísudune!

¹⁴Mimang opanem kaníírula míílona amiekete kadung; dekedelok bulu paala dola yékedung.

¹⁵Tapade ome annyiko kadung, delokke annyi delokke amíne, “Ngom bitola!” Agom appiko edílote apíí lamape idung:

¹⁶Siko nyokko amode, mime negende, pedong míína moopíde, delokke mitlayimanam meyode.

¹⁷Séko abuem ngilkadope lumandudí, demangkom eejorongem agí anem mepak sududí, bí sogumlokke dopename, demangkom pemílokke amigem gaatup pename.

¹⁸Atí appiko kadung, de ngokkepe míngkén manam irisinyope inam atíeke.

¹⁹taleng telo yobna pemíde, líírelo eena tabíde, jajie siyéng teyolo gípekuem paanamde, delokke miluelang mime ayang ibosunamde.

²⁰Sikepemin míngke pííramna ménge idune: Bí abír irongem, ursupala podung, “Idakkom ngo atí imem imang!”

²¹Agom appiko amonge doolang gemape idung:

²²Abíle rojape inamem, mide somoe bíkke dopenam tabunge kasunamdem,

²³belumrunam mime kone miloko paanamdem, delokke mime béérange agí mime ruutumke ayanpe yénamdem.

²⁴Tani amoso ansoodola, kénname ina simon appiko kadung:

²⁵Taruk: bulu ralmadung, idola lobokepe bulu donamem mekumdung.

²⁶Ketí-kejak: buluteng ralpete ralmang, idakkom bulu agí ekumem lííreng arulo modung.

²⁷Pemír: buluke roja kamang, idola bulu opéé opéé yédung.

²⁸Siipajonjo: no akonem alaglo bomlado, idola no dekedem roja ekumlo paayé.

²⁹Atí appiko kadung, dekede buluke gídagem kaaname kampue idung:

³⁰Myomur, bí ralya yalumne, delokke sékomete pesomana simone;

³¹sobén; kekímrupe gígoona rokpo; delokke amikídíke keralo yon gena roje.

³²No mide yao kísa adum ale ila atímana ipe emla idumílo, asoope míngkí pootoka!

³³No gakírem giddum sumílo makonem paayé. No akonke nyobungem kíttomílo, de nyobi bíddo. No luak iakmílo, ebínkolo duunamem paayé.