Read Alladian NGIITOM SIRUNG 4 Bible Online

NGIITOM SIRUNG 4 - Alladian bible

NGIITOM SIRUNG 4

¹Ngokke oo kídía, noluke abue ingkuem luyildudí, dem tatgap langka, tadíí langka, delo nolu tatkényé.

²Ngo ingkuem nolum luyildudí, de aine delok legape sikesim mínggap gelangka.

³Ngokke koo amépe idungem, ngo petom ane abuke oo atelíai.

⁴Ngokke abue ngiitomem sikepe potuai, “Ngokke ponamem míípang sulangka, delokke dem mitpan sumapeka. Ngokke ponampe ilangka, delo no turyé.

⁵Gyan kénnamem paalangka! Ngokke ponamem mitpan sumapeka, demangkom tatge sigemang imapeka.

⁶Gyanem mepak sumapeka, delo bí nom mosiiyé; bím ayalangka, delo bí nom edíípe meyé.

⁷Gyanem paanamde nokke ilanam bottena atíko. No ingkuem paadudí, míngíng kítoka.

⁸Gyanem ayalangka, delo bí nom bottemoyé. Bím gomrík sutoka, delo bí nom amín kamoyé.

⁹Bí nokke angunna dumluppe iyé.”

¹⁰Tatgaptola, oo sakkenga! Ngokke nom ponam agomsim mínggap langka, delo no turteyé.

¹¹Ngo nom gyan emlang yéjinam bedangem poyilto.

¹²No milo arola yédu mílo, sékote nom daksékna kamayé, delokke dukdungem tupsumayé.

¹³No ingkuem kéntodí dem agínpe míípa sulangka. Nokke pori kénnamde nokke turnamsue, dem bomgap sulangka.

¹⁴Atímana ami kídíke gíkolo gímapeka. Loorí mana amiem kaayii sumapeka.

¹⁵Depe imarupeka! Atímanam lokke moote langka! Dem luyasula agíke bedalok gísu langka.

¹⁶Loorímana ami kídíde, bulu atímana atíko imang tetengem iplímape idung. Akonem tarí iketmangem ipmape dartídung.

¹⁷Líínam delang díínam monamde bulukepe dotké tííbesue.

¹⁸Mííjína amilokke yénamde doonyi arsang akame, longe angune píímang tetengem de angun yayang idung.

¹⁹Atímana amilokke bedade yoh kísape kaamue idung. Bulu oletdung, idakkom ingkolo tupsu todí dem kaapa sumang.

²⁰Ngokke poyilnam em, ngokke ua, mínggap gelangka. Ngokke agomem tatgap langka.

²¹Dekedem nokkelok ngétgé moku mapeka. Dekedem mínggap geyar langka, delokke aapílo bomgap langka.

²²Dekedem tatkénna kídíe turnam emlang amíl ainamem paadung.

²³Nokke míínamem míngíí langka; nokke yénamde nokke míngkorlok idung.

²⁴Aro mana atí kídíem pomapeka. Mepu yadpu, delokke poru pogong agomem melangka.

²⁵Jonnampe míídasula kaato sulangka; annyingla nokke dumpongem ngemgíp sumapeka.

²⁶Mínggapla nokke ipenamem ilangka, delo nokke inamde aina atípe iyéku.

²⁷Atí manem mepak langka, delokke jonnampe gílangka. Aina bedalokke lekor kokom gípel mapeka.