Read Alladian NGIITOM SIRUNG 5 Bible Online

NGIITOM SIRUNG 5 - Alladian bible

NGIITOM SIRUNG 5

¹Mínggap langka ngokke ua, ngokke gyan emlang erab bomnamem tatgap langka.

²Delok rongem no kape kísa iyi-isangem ipe aidodí dem kényé, delokke nokke agomde nokke kénnamem lengkan suyé.

³Amikonke ménge ngullang kísape tiinam ngamnampe poyé, delokke bíkke mumpupde olib tél kísape remele iyé,

⁴idakkom dekepe irongem bí nom atíyang imang, idola adír asong petomem paamoyé.

⁵Bí nom tani amo sokke nyokpekolo níílíkyé; bíkke gíko bedade sipeko bedange.

⁶Bí turpeko bedalo duumang; idakla delok gípek lendung, delokke kape idudí dem kénsumang.

⁷Supak tatgap bitola, ngokke oo kídía, delokke ngokke ponamsim mitpan sumapeka.

⁸Sikena mime loge mooteng langka! Bíkke lamgélo gínín pete mapeka!

⁹No depe imílo, nokke kerangke paanam mínggenamem abíde paayéku, delokke no yaamé dungadape ayang kamana ami kídí alaglo silíkyé.

¹⁰Arope mibue nokke ekurang takamem laayé, delokke no ingkona agérem ibom todí de amikepe iyé.

¹¹Nokke silík peko ippulo, no sigín gíntíla ketyé, nokke amíl emlang adínem donyokyé.

¹²Delo no poyé, “Kape ilai ngo kénmatone? Ngo kape ilai akonem poyil kosumatone?

¹³Ngo ngom luyilnem tatmato. Ngo bulum tatgap bimato.

¹⁴Dekepeila menang asak agí sue repe sinying keralo annyingem paasuto.”

¹⁵No agíke méngem mínggap sulangka, delokke no bím petom ayalangka.

¹⁶Akon mimelok paanam ome-oo de nom aina agér ibimayé.

¹⁷Ami moomemem, emmape nokke ome-ue nom iguldope siisape aido.

¹⁸Depe ila nokke ménglo ashépe míírí sulangka, delokke nokke méngpe laanam mimem ashéng bosulangka.

¹⁹Kamporuna ayanam dumne kísape míísulangka. Bíkke kampona mingmue nom ashéng modak langka, mimedem nom ayang modaklangka.

²⁰Ngokke ua, kapeila nokke ayangem mimekonem biyéne? No kapeila akon mime kampoem kaabo yangkane?

²¹RUUTUM bí nokke inam atí takamem kaadung. No ingkolo gíyédí, bí kanggap bomdung.

²²Ami atímana lokke paab kídíde bíkke egumsue. Bí agíke paab gumpírlo olík sudung.

²³Bí agíem mosing sumang kolok sidung. Bíkke loorímang kootír lok bí agolo aasudung.