Read Alladian NGIITOM SIRUNG 6 Bible Online

NGIITOM SIRUNG 6 - Alladian bible

NGIITOM SIRUNG 6

¹Ngokke ua, no akonke ajéngem togeyé emla pésutonía?

²Nok agí agome nom yadsu tokunía, agíke pébisunam agome nom umsu tokunía?

³Demílo ngokke ue, no delok ami delokke alaglo dung, idola sikepe nokke lenkupeko bedange idung; bíkkíng menape gíla, nom melen dokupe bím rogutola.

⁴No agísue ipnge sumarupeka, demangkom nokke migyue tebeg mapeka.

⁵Pettang kísape etku lokke yobge tolangku, demangkom sidum kísape apta miyok lokke dugge tolangku.

⁶Ríksona amie taruge kape yédudí, delok kaayil supe aido.

⁷Buluke miro kamang, ruutum kamang, yébona milum kamang.

⁸Bulu buluke dotkéem díyulo gekumsudo, dígínlo dodoku.

⁹Loobakna amie, edítko ippulo kettí yéne? Edílo bí gerep yékune?

¹⁰Bí podung, “Ngo anyongko ippooyé, ngo lakyétsula anyongko apéépooyé.”

¹¹Idakkom bíkke ipdungem, dokait kísape tong aryange aabomyé.

¹²Loorímana mirul amie megoo yadgoola yédung.

¹³Nom yaddope, bulu amiglok ruubo sudung,

¹⁴buluke dungkollo duuyi mape atímana agérem míítí sényila, rego mipílo luuk pouklíkla yétídung.

¹⁵Sikepe ikolok gíínam lomname kénsumadope, buluke teyolo aala, bulum sita simang dope iyé.

¹⁶Agom kínítko RUUTUM bí akdung, delokke doolang gemang:

¹⁷Adum alenam, mena ayodem, imem kamana amiem petna,

¹⁸atímape míírí míínyonana aapí, atímana agérlo duknana ale,

¹⁹menam hakii bimín sunam, delokke angong arum gooralo yényi yéso ilenbona ami kídíde.

²⁰Ngokke ue, abue nom kape poyédí, depe ilangka, delokke nokke ane kape luyiltodí, dem mitpan sumapeka.

²¹Buluke agom kídíem no agínpe bomgap langka, nokke aanglo mesing langka.

²²Buluke luyilde nokke mibo enyém nom enboyé, yuem kaabomyé, delokke nom longelo luyilyé.

²³Buluke pogapnamde longe angun kísane; buluke lurat poratde no kape yékan dodí dem poyil layé.

²⁴Si nom atímana mime lokke moote moyé, amikon méng lok tatpo-kayo ponom lunom lokke ansumoyé.

²⁵Buluke kampo tayyuem kaabo mapeka, buluke amig belelok sotko sumapeka.

²⁶Ami akone notiiem roti atellok relado, idakkom abír imem kolok bíkke jénam remname nyokyéku.

²⁷Nokke egem gumadope, no angkelo emem gombom layénía?

²⁸Alem baasu mape, mepom teyolok no gílayénía?

²⁹Akon méngem ketbonamde, deke kísape peso yiríname. Sékodí dekepe idune bí adír paayé.

³⁰Kenoduem dosi-tíísi namdem doppyonge emma lado,

³¹idola umkosumílo, bí lemkínít ko bojéyape dorlatkupe aiyé. Bíkke kanam takamem bí bingumsupe aiyé.

³²Idakkom séko abír ayo idudí, bí atí kénsumang. Bí agíemmin ikasudune.

³³Bím annying moyé, delokke demngééyé, bím annying suyarmoyé.

³⁴Nenamde miloem séngéé yalumpe marmodung; bíkke edo rakunamde irí kaimang.

³⁵Bí ajéng dornamdem tomayé; ingkona atíem bidakkom bík marlíngem binumayé.