Read Alladian NGIITOM SIRUNG 7 Bible Online

NGIITOM SIRUNG 7 - Alladian bible

NGIITOM SIRUNG 7

¹Ngokke ue, ngokke ponamem míípang sutolangku, delokke ngokke ilangka emnamem edílote mitpan sumapeka.

²Ngokke ponampe itoka, delo no turyé. Nokke amigem mosing singgap sunam kísape, ngokke luyilem aipakpe igelangka.

³Ngokke luyilem nokke aapílo bomgap ayar langka, sim aanglo mínggap gelangka.

⁴Gyanem nokke bírme kísape míílangka; delokke kénnamem nokke ngoojung kísape ilangka.

⁵Bulu nom akon méngem imem supe kolokke, ponom lunomna mime lokke moote moyé.

⁶Longe konem ngo ekum kirkilok kanggo sula dungai,

⁷depe iduem akor kamana yaamé eke bojéko ngo kaato, idola mide amiko ngo kanggapto.

⁸Bí mime dungko bedang kéényung delok gíman dagai. Bí mime ekum anín delok gípatto.

⁹Delo adenge kaamo dakbong.

¹⁰Delo mimede bím kaarík suto; bí notii leemuem gela bím nomnana aapíem mííru suto.

¹¹Bí aapí bottela annying kamape, bedalo gíyarna mimeko,

¹²demangkom lekonem bojarlo dakyala daktínako.

¹³Mimede yaamédem gomla mumpupto, bím mingmue ngéérík sudola poto,

¹⁴“Ngo silo ipak amanem ilíkto, delokke ipaklo petlíknam adíne kadung.

¹⁵Dekepe ila ngo gílenla nom kaata dung. Ngo nom matape mííduai, nom so paato.

¹⁶Ngo Ijiptlok langaanam lainen gasorem ngokke ippulo putung.

¹⁷Ngo dem atí atí nampona mir, aloi, delokke siri-porilok ilíktung.

¹⁸Aatola! Kaju yoh rubungem abír ayangem ibosulaju. Ngonyi gombosula ashéng bosuyé.

¹⁹Ngokke milue ekumsi duumang. Bí mootelo mibo enkai.

²⁰Bí abalem kanampe gekai, delokke sopta annyi madem aalat kumayé.”

²¹Dekepe iname bí yaamé dem gomla ponomto, delokke bí mime lokke ponom kolo olíkto.

²²Menang asak gooruem pape emla bobomnam kísape, sidume egumlo batko sunam kísape, bí ikosuto;

²³de yongmo lok aapíem patkénam kísane. Bí esaplo omemsuana pettang kísakai, bíkke yépename atímape ipelo emla bí kénsutomang.

²⁴Supak demílo ngokke oo kídía, ngom tatgaptola. Ngokke ponamem tadíítola.

²⁵Sikena mimelo nokke aapíem ikum kosumapeka.

²⁶Bí deddína amike iruge, delokke sanam yimanam amiem nyokmone.

²⁷No bíkke ekumlo gímílo, sipeko amolo gídung. Si situng dorpong peko bedange.