Read Alladian NGIITOM SIRUNG 8 Bible Online

NGIITOM SIRUNG 8 - Alladian bible

NGIITOM SIRUNG 8

¹Tatgaptola! Gyane tomlendung, legange bím tatyépe emla idung.

²Etpang teyong kídíke bedang ampelo, delokke bedumlo bí dakdung.

³Taonpe angko luyab ampelo bí tomdung.

⁴“Tani kídí nolum ngo rogudung; tani amoso duuna mipil miyongem ngo tomdung.

⁵No peebeng manga danía? Kénbe sulangka. No mide dunía? Míípat sulangka.

⁶Ngokke gairuna agomem tatgap langka; ngokke nom ponam takamsi poba runame.

⁷Ngokke ponamsi arorunge; menamde ngokke belum name.

⁸Ngokke ponam miyong si aroe; menam yadnam, demangkom pomemnam kamang.

⁹Milo aro aapí genakepe, si takamsi berokdung; kényin suna tanikepe si jondung.

¹⁰Arem tadogem pemílo ngokke pogap namem totoka; gairuna uunem pemílo kénnamem tolangka.”

¹¹“Ngo gyane, ngo tai tadogem aiyane; nok míínam tabungde ngokkíng popeng sukan mang.

¹²Ngo gyane, delokke ngokkelo kénname kadung; ngokkelo kénname, delokke míípe míngore kadung.

¹³RUUTUMme míngge namde atímanem belum name; Ngo koyit sunemlang adum ale inem, atímana bedangem, delokke menam agomem nyotdung.

¹⁴Ngo míírung irungem idung, delokke dem asoope igedung, ngokke tatkén nana aapíe kadung, delokke raldung.

¹⁵Ngo roja kídíem amiem yébo dope igul dung, delokke among ruutum kídíem aina ayonem ibodope iguldung.

¹⁶Tani amoso ruutum miyode ngokke igullok yébodung, pokan bina amiem lang migíng kídíem akampe idung.

¹⁷Ngom ayana kídíem ngo ayadung; séko ngom matadudí bí ngom paalado.

¹⁸Jénam emlang ikumnamem bidope ngokkíng, mirem elang yidname kadung.

¹⁹No ngokkelok ingkuem paadudí de gairuna uunem aiyadung, arem aroem pakya dung.

²⁰Ngo yéjinam beda delok gídung, tetena bedanglok ngo gímíndung.

²¹Ngom ayana kídíem ngo sérangem bidung, buluke ekumem murkope bíísét modung.”

²²“RUUTUM bí ngom takamke kerayalumpe píto, lendak aadak lokke bíkke kerayalum agére.

²³Ngo ballen delokkai, tani amongem pílen mangadape píname.

²⁴Siyéng eene lenmang adape, asi sirung lenmang adape ngo oname.

²⁵Dííte moopangem pímang adape ngom oto.

²⁶Amosim lang arígem Shédíke pímang adape, demangkom kédéng lakyum kote lenmang adapekai.

²⁷Talengem dungkolo leelík dodem, siyéng eene rotkonem kaapí yimadope ido delokom, ngo dung,

²⁸talenglo doomugem melíkla, siyéng eene sirungem ruulendak delo,

²⁹delokke siyéng asie gooya dope bíkke lulíkdak delo. Bíkke among kiinyuem pílíkdak delokai, ngo duubong.

³⁰Ngo ekumem kampope ruubo mobona kísape bíkkíng, loodíke bíkke ashéng séngkepe bíkke keralo agínpe ashéto,

³¹tani amongem aibosuto, delokke tani kídíem ashéng bosuto.”

³²“Supak yaamé kídía, tatgap langka, ngok ponampe ilangka, delo nolu ashéyé.

³³Nolum luyilnem tatgap langka. Ami arope ilangka, dem elai delai emla míímapeka.

³⁴Ngok lunamem tatgapna, ngokke eyablo loodíke daktína, ngok ekum lamgélo toyana amide ashéyé.

³⁵Ngom paana amide turnamem paadung, delokke RUUTUM bí bím ashébomyé.

³⁶Ngom paamana amide agíem inyok sudung, Ngom belumna kídíde sinamem ayane.”