Read Alladian NGIILU TUUNA 1 Bible Online

NGIILU TUUNA 1 - Alladian bible

NGIILU TUUNA 1

¹Jirusalemlo rojape ituana Dabidke Poyilna oo lokke agom kídíe sikesi:

²Ato-siro takamsi loorímang, yénamsi loorímang, loorí berok mang.

³Tani amongso agér-anam inam tabusok ingko paapek koda tanie paadun?

⁴Siirum kon kone aadung, delokke siirum kon kone gídung, idola tani among si akampe iyardung.

⁵Doonyie saadung delokke uadung, idola uarongem sangko danpe billat suyar dungku.

⁶Dooyi esare sokkope muttokdung, delokke línggíngpe mutsadung. Dekepe mutkup-mullat sula idan tetedung.

⁷Asi korong takame siyénglo biddum sudung, idola siyénge bíídí kamang. Korong kídíe biilen kolok, lekoda biilat sudungku.

⁸Tanie pola suyimadope agér-anam takamsi ingéé sunameke. Kaatí dokom amigsi apíírupe kaayindí kamang, delokke nyorungsi tattí dokom, apíírupe tatyindí kamang.

⁹Ingkue katuadí, de kayéku, ingkuem itodí deme itíyéku, tani among so anína atí kamang.

¹⁰“Sina, kangkí-kénkímanam ato aníko,” emla polanam ato aníko kayén? Konnying-mennying kai ngolum omang adape ato takamde kadubong.

¹¹Sékoteng yétonamem míípang suyar gena kamang, delokke yébom dunam simteng yépenamlo mínggekuna kamayé.

¹²Jirusalemlo Poyilna ngo duula, Israelke rojape ito.

¹³Delo ngo, taleng rumkíngso agér-anam idu-satok tabungem kénnamlok kénkípe, delokke porila kangkípe emla ito. Shédí bí tani teyolo tebegna egedem gemotung.

¹⁴Tani among so ato-siro inam takamem ngo kaayinto. Dooyi-esar méélamlo monmín genam kísa ato takamde ido.

¹⁵Kelna atoem no hojon layimang, atí kamang kolo no atí sanlamang.

¹⁶Ngo agíem míísuto, “Jirusalemlo ngom kerape roja ipoona kídíem pemílo ngo kényangkai. Kénnam-paanamde ingkue emla ngo mííjin yangkai.”

¹⁷Depeila gyan kelang matumke angusu regoem kénlenrupe emla ito. Idola dekedete dooyi-esar méélamlo monmín genam kísa inampe ngo anto.

¹⁸Kapeila edítko kénname kayédí, deddíko ankí-kenoe kado, delokke edítko gyanem paayédí, deddíko atung-arééem paado.