Read Alladian NGIILU TUUNA 10 Bible Online

NGIILU TUUNA 10 - Alladian bible

NGIILU TUUNA 10

¹Kapekísa nampona télem tamid simange namnyi modudí, delok kísa kénna-paana amín kanem anyongona bopol ségue loorímape imodung.

²Gyan kana amike aapí-aange aina atolo míídung, idola bopol amie atímana atolo míídung.

³Bedu-bedanglo gídungemte bopol amide ségu kamala, takam kangkolo bíkke loorímana akor-siyorem lengkan sudung.

⁴Edílo nokke migome nok teyolo marbom yédí, delo no agérem mepak kumapeka. Nokke dengompe dunggenamde imem bottemte ijon dungku.

⁵Among ruutum kídíke yémem bonam, loorírumana agérko tani among so ngo kaapadung:

⁶bopol amiem migom-mitem yébom motung, delokke mirem amie rumkí yanalo duudung.

⁷Ngo abíl kídíem guré teyolo duudope, delokke roja oo kídíeme alelok abíl kísa gísudope kaato.

⁸No arungko kooyémílo delo no oletsuyé; no língkum yapgolok bénayémílo, tabíe nom payé.

⁹No elíng gatlen kolo agér imílo, elínge nom kimoyé. No esing takyémílo, delok no kinam ipang sudung.

¹⁰Nok egíngde tolmangko teyolo ratmamílo, no tollík-rallíkpe aiyé, iname dekeme kénrung-kaarung sugepe aiyé.

¹¹Tabí umnade tabídem ummang adape pako suyémílo, bíkke tabí umnana kénnamde agér bimang.

¹²Gyan kana amike agom-aang ponamde yidnamem bomadung, idola bopolde agí agom sulok nyoksudung.

¹³Kerang lokke ila bík agomde nyorunglo aamadope poyé, delokke potíl-posalo tumna kísa iyé.

¹⁴Bopol amide porí kaimape podung. Ikupenamem sékokom kénmang, delokke ngoluke sirongem kape iyénadí dem ngolum sékokom pobi lamang.

¹⁵Bopol ami lok agér-aname bíme adung-apéémola, agíke ekum bedangemte kénsu yimadung.

¹⁶Edílo among delok rojade koo aménakope ila, delokke ruutum kídíe yoh raajang loope doman-tíímanla itíyédí, delo among delo ankí-kenoe aadung.

¹⁷Idola ingkona among lokke rojae aina ségulok agér-anamem idudí, delokke ruutum kídíe tíngír-dobat sumape, agíem mosisula moodíem dodu-tíídudí de among de gaine.

¹⁸Edílo amikone agíke ekum míílongem isi-imope ríkso yédí, delo doodíe tokla ekumde ramyé.

¹⁹Domande nom ashéng modung, delokke apongde nome erap modung, idola dekedem no abal kamadem ilamang.

²⁰Nokke aapíde rojeme luka mapeka, delokke nokke ipko pírtek arang loteng mirem amiem luge-poge mapeka. Nokke lunam-ponam dem pettang kone bulum lubi langkukom iyé.