Read Alladian NGIILU TUUNA 12 Bible Online

NGIILU TUUNA 12 - Alladian bible

NGIILU TUUNA 12

¹Depeila ankí-kenodí longe kídíe lang dítak kídíe pííla, “Ngo yénam sim ashémang,” emla noluke pokumang adape, noluke mimum-yaamépe siisadungem, nolum pílenna bím mínggelangka.

²Deke delo doonyike, pooloke, delokke takar kídíke angune noluke keralo molmil lenyé, delokke noluke keralok pedong doomuge gyabíd mayé.

³Delo nolume ipítna, noluke alag annyide danyé, noluke supakke ralna ale annyide ralyimayé, noluke iipang kídíde tolnem dola yimayé, delokke noluke amige kaamol lenyé.

⁴Bedang lokke adud-ayudem noluke nyorung de ruubéla tatyimayé. Mil lokke aam kétdudem améngope tatpaayé, demangkom miri tapungem améngope tatpaayé, idola pettang adudo eteng nolume ipdungem darmoyéku.

⁵Nolu kedonkoem pesolenyé, delokke gígong name pesonampe iyé. Noluke dumíde dumpu lenyé. Nolu agísuem dadape hatsula gíyé, delokke noluke ilíng tabungde nyokyé. Tani ngolu nyokyimana ekumlo gíyéku, delo bedung bedanglo kabbom-riíbomname kayé.

⁶Baldín lunggue bínpan suyé, uun lok monam lém merue oletla benyé; asi sosang nana sotkyade bínyé, delokke asi mekeng kilínge benpan-benran suyé.

⁷Ngoluke amílsi tani among sokke demullo aalat suyéku, delokke turnamke nganam si, sime ngolume bina Shédí kíng gílat suyéku.

⁸Agér kamang, agér kamang agér rung kamang emla Poyilna bí podung.

⁹Poyilna bí gyan kana amipe itoname, bí ami kídí takamlo bík kénnamem poyil yiltíto. Bí lurung-porungnam ngiitom kídí eme aipakpe kaamík pala, deke delokke aro kídíeme ikang-kaayin kíto.

¹⁰Poyilna bí aina, delokke jonna agomem míítala, edíímona aro agom kídíem atto.

¹¹Kénna-paana ami kídíke ngiitom ponam kídíde mér sobén kídíem kaabomna lokke edíína banggén bomnam kísane. Lurung-porung nam ngiitom kídíem laadum sunam kídíde demlíktunam kili kísa edíngne. Dekede ngolum takamem kaabomna Shédí atelke ngiitom binam kídíe.

¹²Ngok ue, sike-sokke teyolote kangíng supenamko kadung. Sikena legangem deddína kitablo atdokom atyin mayé, delokke yagorupe porimílo nokke amíl sude apééyé.

¹³Sike takamke teyolo agom atelko luyil penam kadung: Shédíme peso langka, delokke bíkke luyilem tatlangka, kapeila sok legang pemin tanime pílentone.

¹⁴Ngoluke aipe inam emlang atímape inam takamem, delokke ami kénmang dope isi-irumnam takam emteng, Shédí bí kebang lubomyéku.