Read Alladian NGIILU TUUNA 3 Bible Online

NGIILU TUUNA 3 - Alladian bible

NGIILU TUUNA 3

¹Takam atí legape idíko kasudung, delokke taleng rumkíng sokke ato-siro inam takam kepe, agí-agí moodíko kayin sudung:

²olendí moodí kolang, sidí-nyokdí moodíko, lelíkdí moodí kolang, busatdí moodíko,

³petpakdí moodí kolang, ipítdí moodíko, benpakdí moodí kolang, molíkdí moodíko,

⁴kapdí moodí kolang, ngildí moodíko, ankí-kenodí moodí kolang, miri ludí moodíko,

⁵dabuem ijérdí moodí kolang, ikumdí moodíko, gomríksudí moodí kolang, gomrík sumadí moodíko,

⁶matadí moodí kolang, mayémla mepakdí moodíko, mesiidí moodí kolang, yoppakdí moodíko,

⁷bétpakdí moodí kolang, omsutdí moodíko, agom ludí moodí kolang, asoope idí moodíko,

⁸ayabosudí moodí kolang, akmín sudí moodíko, mimak idí moodí kolang, eetetdí moodíko.

⁹Agér inabí, bíkke agér lok ingko paapek koda paadun?

¹⁰Tanilo Shédíke eget ruulíknamem ngo kaato.

¹¹Agí-agí moodílo kampodope ato takamem bí píyintung. Tanime bí míírung-kaarung sudope ruulíktung. Idola bíkke iyi-isangem, ilen lokke ila iyin loope kaapíng-kénpíng madung.

¹²Tanike turdungem aina agérem ila, ashéngpe yénam kísamang emla ngo kénkai.

¹³Kapeila mipil-miyongde agí-agí agér itínglo aapí-aange apíírupe dola-tííla yénamde Shédíke aman biname.

¹⁴Shédíke inam tabungde agínpe turyaryé, delo item yapenam kamang, delokke ipak yapenam kamang; kapeila tani bí bíme peso-ríanla yédope, Shédíbí dekepe itung.

¹⁵Ingko-ingko ato-siroedí itobone, demangkom iyéne dekede kerapekai itobong. Shédíbí iruklo itímodungku.

¹⁶Sike-sokke teyolo, jonnam loklang pénsam raadang lok ipeko ayanpe atímape iname kadope, ngo tani amongso kaato.

¹⁷Depeila ato-siro takame lang deke delokke agér anam idung-hatok tabungde agí-agí idídem isuyéku; iname Shédí bí deenem lang atímangem akampe kebang baabom yéku emla ngo mííto.

¹⁸Sok teyolo, tani ngolu simon-siliem pemílo gaiyamang emla Shédí bí ngolum lengkanla ngolume aapí ikadung emla ngo míngkai.

¹⁹Kapeila tani kela simon-silike yéyinde akame. Simon-sili kísape tanie kom sidungku. De annyide pínam terenge. Simon-siliem pemílo tanibí gaiyamang, legade tanike lang simon-silike yénam de atí agér bimane.

²⁰Takamke gíkupeko bedade atele. Takame kédéng lok aato, delokke takame kédénglo gíyéku.

²¹Depe irongem, tanike aide teyongpe saayéku, delokke simon-silike aide sutkin kédépe tokyéku emla séko amieda kéndun?

²²Depeila, ngoluke agér gérbomnam teyong so ngolu ashéng-angam rupe yépe aido, emla ngo kangkai. Kapeila sike sokke kékonlo ngolu anguyang ikénmang. Ngoluke sirongkuem ngolu kape idung kudí, dekedem kénpeko bedang atí kamang.