Read Alladian NGIILU TUUNA 4 Bible Online

NGIILU TUUNA 4 - Alladian bible

NGIILU TUUNA 4

¹Delokrongem, tani among so iréé-inyola inamem ngo lekoda kaapato. Iréé-inyonam amie kapdo-ríído, idola bulum ngiina kamang. Sékote bulum igulna kamang, kapeila iréé-inyona kídí delo tolnam ralname kadung.

²Depeila sina-nyokna ami kídídem ngo nekai. Legade, turla yékína kídídem pemílo bulu aiyangkai.

³Idola tani amoso iréé-inyonamem séko buludí kangkímane; séko bulumdí olen kímane, dekede turla yéna kídíem lang sina kídíem aiyane.

⁴Delokke ngo kaato, tanike agér inam tabung delang jénam-remnam takamde kumríeme nemín sukolok lendung. Sikom dooyi-esar méélamlo monmín genam kísane.

⁵Ríksona amie alagem gomyét sula kenoem pínka kosudung.

⁶Asarem ummín gepe emla, alag annyie momang namdem pemílo anyong atolok aapíe eetetpe duunamde gaiyane.

⁷Lekoda, tani amongso agér kamana atoko ngo kaapato.

⁸Agí atele duusuna taniko kaato. Bí ome-oo, bírme-bíro atí kamang. Idola bí, deddípe mirem late aapíe apíímape agér mílílo gértídung. Dekemílo agíke ashéng-angamem mepakla sékoke legapeda adírrupe bí agér itíbomsukan? Sikom aré-anyorupe yéname, delokke agér kamana bedange.

⁹Midum atelem pemílo midum annyie aiyadung, kapeila annyi lokke agére sési yadung.

¹⁰Akone olet namko kamílo, akonde igulla irep dungku. Idola midum atelde oletnamko kamílo, de bíírík aloomane, kapeila bím igul penayang kamang.

¹¹Ansing kolo midum annyide ibbosula iiga bosuyé, idola ami atel de kapekísa iigang sulayén?

¹²Ami atelem ikumpena momínem, midum annyide leko bosula tolya sulayé.

¹³Yaamé koo kone aré-anyope siisala, bíkke among lokke rojape ilado, demangkom patek loge roja palenglo dunga lado, idola bíkke mijing yékuem aina ngiitomem tayyimape bopolpe batkunamde, aré-anyo dokom kénna yaamé koo kísamang.

¹⁵Ngo doonyi rumkíso duuna, delokke gíkína takamem, rojaem yétít kupena yaamé koo delokke méélamlo gímín gedope kaato.

¹⁶Roja lokke yébo dungem mití-maglíngem yébotuape, idola roja delokke sirongkuem sékokom bíme airudo emla aang ona kaimang. Sike sikom dooyi-esar méélamlo monmín genam kísane.