Read Alladian NGIILU TUUNA 5 Bible Online

NGIILU TUUNA 5 - Alladian bible

NGIILU TUUNA 5

¹Shédíke ekumlo gíayém nok lekorem ansulangka. Imemem kénsumana bopol kísape ipak ilík namdem pemílo, luyil-poyilem tatpe emla delo gínamde aiyadung.

²Nok nappade menang mapeka, delokke aapíde Shédíke keralo agom popang penamem lommapeka. Shédí bí teyong amonglo dung, delokke no tani among somin duudune, depeila nok agom-aangde anyo langka.

³Kapekísa ankí-kenoe bojéyém immange maanyinge idudí, dekekísa agom ngomdukla iyém bopol kísadung.

⁴Edílo no Shédí kíng atoko ipe emla pésuyédí, deme menape ipíng bilangka. Nok pésunam dem ipíípe aido, kapeila Shédí bí agom petompe ina bopollo erapmang.

⁵Ipíímape pésudumem pemílo pésumape inamde berok yadung.

⁶Shédíke miriem no dekepe manmangíai emdokupe, nokke agí nappade nome paablo olet mope aimang. Legade nokke agí alaglok agér inam tabung dem, nokke agí pomem sulok Shédíme aklímola inyokdope kape imoyékun?

⁷Immang mílílo maala, agom-aang bojénamde bopol ségue. Depeila Shédíke keralo pesoríanla, Shédíme yirí-pedípe míílangka.

⁸Edílo among ruutum kídíe opan-arénem aina kebangem baabimape buluke paape-dopeko, yédung-yétok tabunglo iré-inyodope no kaayédí, delo no míírí-míínyope míímapeka. Kapeila among ruutum akon teyolo akone kaabomdung, delokke bínyike teyolo teng kaabomne kadung.

⁹Among lok lenna ali-ayé teyolo takame míída suyindung, delokke arík lokke ali-aam teyolo rojete míída sudung.

¹⁰Séko bulu abalem ayadudí, bulu edílokom airupe abal kadí kamayé. Séko bulu arem-tadok abalem ayadudí, bulu edílokom buluke paanam delo aang apíídí kamayé. Sike sikom agér kamane.

¹¹Mireme remyamílo, dope-tíípenete bojéyayé. Miremkai emla míísunam petom delo aange apíísuyé.

¹²Anyope dolai, bojépe dolai, agér iyana ami lokke ipnamde ipporupe ipdung; idola deddípe ato-siro kana amide, ipmi kamape daaran dung.

¹³Tani amongso atírumana legangko ngo kaapadung: ekuserang leesi suname agíem dosu kunamete kado.

¹⁴Delokke kompal kamalok ekuserangem nyokmo langkula agíke ome-oo kídarke yékeng kakumape inamete kado.

¹⁵Amíl araape ane akiilok tanie lendung, delokke kapekísa bí aatodí, dekepe bí siyéku. Bíkke alaglok ankípe agér ibom sudula paanam ekuserangem, bík nyokla gíku kolo gíbom kumayé.

¹⁶Tanie aadung delokke gídungku, tanike agér inam tabungsi dooyi-esarem gagpe emla ina, atí agér bimana atíe.

¹⁷Tanike longe tabungde adír paala, aklí-silíla, míngasula kaamo aralo dola-tííla yéname.

¹⁸Delo ngo tani among so sime kaapato: Shédíke tanime turmodo anyong longe so, agíke agér ireem dola-tííla ashéngpe yépe aido. Kapeila si yéjon-yétaksue.

¹⁹Shédí bí tani konem ekuserang kala, mirem dope rubi yémílo de amide ashérupe yidgela, bíkke agér anam iko teyolo ashéng-angampe dola-tííla yépe aido. Kapeila dekede Shédíke rubinam amane.

²⁰Shédí bí bíme ashédope rubikolok de amide, bíkke anyope turpenamem ankípe míítí mape, dekeme míípa sumape bí ashépe yénam yésuyé.