Read Alladian NGIILU TUUNA 6 Bible Online

NGIILU TUUNA 6 - Alladian bible

NGIILU TUUNA 6

¹Tani teyolo ibaarumanam agérko tani among so ngo kaapadung:

²Shédí bí ami akon teyolo deddína mirem ekuserang delokke yidnam-paanamem ruulíkdung. Arope bíkke aapí míínamruupe imodung, idola dekedem bíme yébom mokumang. Bík ayanpe mibo miying kone yébom dungku. Sikesi míímem runge delokke agér kamane.

³Ami kone ome-oo língkuem ola, deddína dítak loope turla yélado, idola bí deddípe turdagakom, bík miremem ashépe dobom mape, sidoku lote ai-kampope yunamem pangkumape ina dem pemílo, sidope olennam koode bím gaiyane emla ngo míídung.

⁴Sikena si legang kamape aadung, kaamolo gídungku, delokke amínete kaamolo nyoklík dungku.

⁵Sidope onam koode doonyiem kangkí madagakom, demangkom atí kénkí madagakom, dem miremdem pemílo gaiyangkai.

⁶Dekena mirem amide éjar annyi dítak yénamem yétuakom, bík miremem ashéng namato. Kapeila midum annyi dekai gíkupeko moolop atel lomin gíyékune.

⁷Tanike agér-anam inam tabungde bíkke nappang dogangpe idung, idola bík akiide edílote apíídí kamang.

⁸Matumem pemílo kénna amide gaiyadunía? Opan amide, ami keralo gai-gakongpe ségu lengkannamem kéndagakom, ingkoyang apekko paalayén?

⁹Kaabo-tatbolo nok aapí-aang de míítídumem pemílo nok amig kera lokke ato kídar delo aapíe eetetpe inamde gaiyane. Kapeila legang kídísi loorímane, delokke dooyi-esar méélamlo monmín genam kísane.

¹⁰Ato-siro inam tabungde, kerapekai irung-sarungla mename, delokke amide bím pemílo, botteyana ami akon dem lukí-pokísula ilamang.

¹¹No edít kope lukí suyédí, deddíkope agér kamayé, kapeila dekelok no atí paapek paamang.

¹²Abír-ayope nyokkuna anyongona agér kamana yénam so, sékoda tanike gairupe yépenamem míngkén suyén? Amikonem bík sirongem doonyi rumkíso kape iyénadí, dem séko lubinako kayén?