Read Alladian NGIILU TUUNA 7 Bible Online

NGIILU TUUNA 7 - Alladian bible

NGIILU TUUNA 7

¹Aríkana nampona tél empemílo amín kadope yénamde aiyane, delokke olendí longem pemílo sidí longede aiyane.

²Doman-tíímanko ekumlo gídumem pemílo, ankí-kenoko ekumlo gínamde aiyane. Kapeila sinamde tani takamem toyadung, depeila tani takamde dekeme míípang ayarsula yénamde ainame.

³Ngilnamem pemílo ankí-kenode aiyane, kapeila nokke migmoem moruk moduakom nok aapíem ralmodung.

⁴Ashéng-angam mílílo míítínade bopole, delokke siku penamem kénsula yénade kénna-paana amie.

⁵Bopol amike miri lunamem tatdumem pemílo kénna amike lunamem tatnamde aiyane.

⁶Bopolke ngilnam de emelo tangem romyém buknam adud kísa. Sikom legang kamane.

⁷Kénna ami lokke yadla ato laanam dete bopol ségue, delokke sépsu-paasunamde aapíem deemamone.

⁸Ato-siro takamke ilen dem pemílo, iyinde aiyadung. Aapí hakjémde míngkímem pemílo aiyadung.

⁹Nokke marnam dem hakjém sulangka. Aklí-silíla yénamde bopol agére.

¹⁰“Kerang yéname supak mempemílo, kape aiyatuane?” emla edílokom íngkímapeka. Kapeila de kénna amike agom-aang mang.

¹¹Turkína takamde gyan kana kope ipe aidung, de ane-abu lok ekurang paanam kísa idung.

¹²Abalde kape kísape dokeng-tíngkeng nanape idudí, delokke kísa kénnamde yékeng-dakkengpe idung. Kénna amike yénamem kénnamde mopítdung. Depeila kénnamde dekena ami delokke utepoorue.

¹³Shédíke inamem kangíng kítola; Shédíke gerdope inamdem sékoda jondope ilayén?

¹⁴Edílo legí-sigange aiyédí, ashéng langka, delokke edílo duuk-adíre pííyédí, sim míípa sulangka: Shédí bí ankíemla ashéngem ruulíkne, iname nokke yépenamlo kape iyédí no dem atí kénsumang.

¹⁵Ngokke agér kamana yénam longelo ngo sime kaapato: deena amie deenampe nyokdoku, idola atímana amie atímape deddína longem turla yédo.

¹⁶Depeila no yagopete deebong sumapeka. Depe ikolok kape no agíem inyok suyén?

¹⁷Idola nokke sidí longe píímang adape sidope, no atímangem ibong mapeka, delokke bopol ségu emteng ibong mapeka.

¹⁸Ibong-ikonam annyi sime ansulangka. Shédíme pesola deenampe yéna amide delo-elo yédakkom aiyé.

¹⁹Doolung lokke ruutum íyingem pemílo gyan kana ami atelde ralyadung.

²⁰Tani among so deenamrupe yéla paab kamana ami atel kokom kamang.

²¹Ami takamke agom-aangem aroe emla míímapeka; depe míímílo longeko nok béérang kídíe nome lupu-luyéla idíe kayé.

²²Kapeila nokom amiem bojéko lupu-luléto emla agíe kénsudung.

²³Sim takam sim ngo kénnam lok ikang kíto. Ngo kénna amirupe ipe míítuai, idola dem ngo pííramto.

²⁴Kénnamde mootengoolo dung, delokke eerí aloodung. Sékokom kénlen lamang.

²⁵Idola kénnamem kadope, ngo airupe porila, kangíng-tadíngla kénnam dem malen rupe ito. Atímade ingkue, bopolde ingkue, emla ngok aapí sokke íngkínam tabung dem kénpe ilento.

²⁶Dekepe iduem sinamem pemílo kosayana mimeko ngo paalento. Bíkke nome míínamde nome longeko etku-edape batjém yéku, demangkom esap kísape tarlum bomyéku. Nome gomna bíkke alagde ikoli kope yéyéku. Séko amie Shédíme pesodudí, bí delok ipít sulayé, idola paabna amiem bí umyé.

²⁷Poyilna ngo podung; arope ngo sime anyong-anyope kénlen-paalento.

²⁸Sok kékon lote ngo bedangem makítuai idola paamato. Midum éjar milokong aralo midum atelko míngge penam amiem ngo paato, idola mime aralo midum atel kokom paamang.

²⁹Shédí bí bedang takamem aiyope rujon bitungai, idola tani ngolu loorímape isudung, emla sim petom ngo kénlenkai.