Read Alladian NGIILU TUUNA 8 Bible Online

NGIILU TUUNA 8 - Alladian bible

NGIILU TUUNA 8

¹Ato-siroke legangem kénna ami petom demino kénsudune. Kénnam de bím ngilmodung, delokke mingmo kanyingem nyokmodung.

²Roja lulígem tatlangka, kapeila no Shédíke keralo pésutung.

³Roja keralok lomnampe lenku mapeka. Bík keralo atímana legape dagge bimapeka, kapeila bí agí míngkorpe ato-siroem iladung.

⁴Roja agomde poyin yalumnape itoname, séko bíme darkang kílayén?

⁵Séko bíkke lulígem tatdudí, bíkkelo atímana atí kamayé. Kénna amide bím íngkí-luposudí moodíem, delokke séguem kéndung.

⁶Tanike teyolo dug-adíre tebegpe aadagakom, ato-siro takam legalo agínpe ségu kolang moodíko kadung.

⁷Ngoluke yépenam longem kaalu sumang, delokke sékote kaalu-polu bilamang.

⁸Sékote agí aidem itum sula, sipenamem ipít sulamang. Kapekísa sékomete mimaklo ipak kumadí, delokke kísa atímape itína kídídem atímange edílokom mepakmayé.

⁹Tani among so ato-siro inam takam legangem ngo míngkíduem, ngo sim takam sim kaapato: tani among so ayokone mite-mirem rupe yédo, delokke ayokone buluke rumkílo anka sula agér idak.

¹⁰Delokke ngo simte kaato: atímana amiem ai-kampope yusirongem ingkona doolunglo bulu atímape agér ituadí, delo doolung deloi, agolok píírongkuem amie bulum yidgedoku. Sikom agér kamane.

¹¹Edílo atímape inem menape kebangem baabom mayédí, delo ami kídíe atímana agérlo idope míílendung.

¹²Paab ina amie atímana agérem língko kope idagakom bulu oolooko turdung. Idola Shédíme pesola míngkesuna kídíe Shédíke kangkolo gaiyadung.

¹³Kapeila Shédíme pesola míngke sumana kídíde aina yénampe yémayé. Buluke yénam de abír-ayo kísa menape nyok dungku.

¹⁴Sike sokke teyolo teng tani among so sikepete idung: deena amie atímana amike ajéng paapenamem, delokke atímana amie deena amike aman paapenamem paalatla idung. Sike simkom agér kamane emla ngo poyildung.

¹⁵Depeila tanide turkídung anyo yénamso ashéng-angampe yépe aido. Bíkke yénam anyoso dola-tííla, ashéng-angampe yépe aido emla ngo podung. Depe imílo tani amongso Shédíke bím turdope yépomodo longelo, bíkke agér-anam itíng-satíng takamlo ashéng-angame kamín geyé.

¹⁶Tani amongso ingko-ingkuedí idune, dekeme kénlen-kaalendope edí-edílo ngo míílen yédí, delo ngo sikepe kénlendung: no longe-yohpe dartíla,

¹⁷míítí dakkom Shédíke inam agérem no kénpíng kíramyé, delokke no ralperung igap dagakom, no edílokom kényinmayé. Kénna-paana amie kéndung emla mandagakom bulute arope kénpímang.