Read Alladian NGIILU TUUNA 9 Bible Online

NGIILU TUUNA 9 - Alladian bible

NGIILU TUUNA 9

¹Sike takam sim ngo míngíng-kangíngla mííyin-kaayin rongem sipe kénkai: kénna kela deena amike agér inam-hanam tabungde Shédíke alag aralo kadung. Idola ayabosuedí demangkom aklíng bosuedí kerangem kayéne; sékote kaalu sumang.

²Deena amie lang atímane, aine lang aimane, dormo ine lang imane, delokke ipak ine lang imana ami takamde ruuna atelke ruutílo yéyindung. Aina amilo ingkona ato-siroe aadudí, dekepe paabna ami lote aadung, delokke amkí-pékí sunalo ingkona atoe aadudí dekepe imana loteng aadung.

³Tani among ara sokke ato-siro takamlo si aimane: Tani takamke bedang gítíngde atele. Sok teyolo tanike turdungem, tani aapílo aimana ségue lang tumna aange kadung, delokke méélamlo sikolo bulu gídungku.

⁴Idola turkína pénsamlo duunade míínam sunamko kadung; sina myomurem pemílo turna ekiide aiyadung.

⁵Kapeila turna bí siyéku emla kénsudung, idola sinade atí kénsumang. Sina delokke aman kamang, delokke sinadem kénpa pete suyimang.

⁶Buluke lumín-noomín sunam, ayabosunam, nemín sula inam tabungde bulukíng nyoktak sudung. Tani among sokke legí-sígalo bulu edíloteng agér kamín geyimayé.

⁷Depeila gílangka, no ashéng-angampe donam dolangka, delokke aapíe apíírupe asi-apongem tííla ashélangka, kapeila dekede Shédíke keralo aidung.

⁸Agínpe nok dumpongem tél molsula yasina egem gela ashépe yélangka.

⁹Tani among so nokke loorímana yénamem Shédíke nome yémodungeme, nokke mííbosunam agíke ménglo no ashébosulangka. Kapeila de nokke, doonyi rumkíso adírrupe gérbom sudungem paape suname.

¹⁰Nokke gíkupeko siko amonglo gyan kamang, kénnam kamang, aapí-aang míídu-míítokyang kaimang, agér inam-hanamyang kaimang, iname nokke agér itíngem gai-gakongrupe ibom langka.

¹¹Tani amongso legang konko ngo kénkaku: Dugdugna amie agínpe dukkí sukolo dukkummang, miga-miramne agínpe mimaklo ikummang, gyan kana amie agínpe dokeng-tíngkeng bedangem ikén sumang, kénna amie agínpe miremmang, ségu kala yéjina amie agínpe mite-migompe iyarmang; kapeila kompal ríksu mange takamlo kayindung.

¹²Nokke longeme kaalu sumang. Ngoluke eetet-monetpe yédungem, pettangem etkulo batnam kísa demangkom engoeme esaplok kuulumnam kísa, atímana moodíe kénko sumape ngolum umdung.

¹³Tani amongso gyanem airupe erbomnam lokke legang emte ngo kaato:

¹⁴Ami bojé kamana doolung ko katuai. Dem migang-miram runa roja kone mimakpe iya bomto. Bí doolung dem gargo bomla, yabgoeme béna bompe ikai.

¹⁵Idola doolung delo opan-arédola kénna amiko duutuai. Bíkke gyan lok doolung dem bí ipítto. Idola sékote dem opan amidem míípa-hagya suna kamato.

¹⁶Depeila ngo, “Gyande ralnamem pemílo aiyadung,” emla agínpe podung. Idola opan amike gyan agomem sékote tatbimang, delokke bíkke ponamem mitpan sudung.

¹⁷Idola bopol ami lokke kebanglo ukdudem pemílo gyan kana ami lokke dengompe agom ponamdem tatyape aido.

¹⁸Mimak leemoem pemílo gyande gaiyane, idola paabna ami atele aina atoem bojéko nyokmo ladung.