Read Alladian SOLOMONKE MIRIE 1 Bible Online

SOLOMONKE MIRIE 1 - Alladian bible

SOLOMONKE MIRIE 1

¹Miri kídí aralok tatpoyalumna Solomonke mirie.

²Nok nabbéle ngom mumpupla polum bomdung; onggur alangem pemílo nok ayanamde aiyane.

³Nokke tél aríde nampodung; nampona tél pílennam kísa, nokke amínde idung. Depeila mimum takame nom mííyindung.

⁴No ngome menape dugnyok botoi; ngokke rojape ila, nok pírteklo ngom duumo langka. Delo ngonyi ashéng bosuyé, delo apongem pemílo, nok ayangem yidgeyé. Arorupe nom takame ayadung.

⁵Jirusalemke mime kídía, ngo yoranako, idola kamponako, Kédar lokke yépol tombu kísa yakanako, idola Solomonke roja ekum aralo donnam, ege kísa kamponako.

⁶Ngokke yorangem kaala, kaapak mapeka, kapeila doonyie ngome pammaltung. Ngok bíro kídíe ngome marbomla, ngome onggur aríklo agér gértímoto, depeila ngo agíem aipe kaasi sudí kamang.

⁷E ngok mííbosunama, nok mér kídíem ingkoloda dota moyén? Ingkoloda bulu longe raadangem, apééyén? Kapeda ngo angu konke mér abam aralo nome matapen?

⁸Mime aralokke kampo yalumna no, ngok dungkuem kénmanía? Mér kídíke gíkolok gíla, mér kaabomna kídíke notko, anínlo nok mér kídíem yébotoka.

⁹E ngok yagorupe ayanama, no Pharaoh rojake guré gaariem sona guré kídíem kapekísa guré réne ermodudí, dekekísa erap modung.

¹⁰Nok dumídde nokke mopumlo, kaabang along líkdung; delokke nok alínglo de tadok asirna kísa idung.

¹¹Idola ngolu nom baldín lok leemo líknam, uun lungguem mobiyé.

¹²Ngok roje bík ketkenglo ketdungem, ngok tél arí nampone bííbomkai.

¹³Ngokke mííbosuname, ngok angkeso tapdasula, mir aríem namkai.

¹⁴Engedi lokke onggur aríklo, henna appun punna asumkísa ngok mííbosunam bí idung.

¹⁵E ngok mííbosunama, edítko no kampodun, Nok amig annyi dete, edítko kampolok asirdun?

¹⁶E ngok mííyayalum sunam, no ngom edítko ashéng modun, Íími kídarsi ngonyike ketkepe iyé;

¹⁷ngonyike ekum gaangpe sidar esing boronggae iyé, delokke sipres esinglok, kumbangem iyé.