Read Alladian SOLOMONKE MIRIE 2 Bible Online

SOLOMONKE MIRIE 2 - Alladian bible

SOLOMONKE MIRIE 2

¹Ngo Sharon lokke monam appunpe komin, delokke gíílíng-géjong lokke lili appun komin.

²Tang kako aralo lili appun kaanam kísa, mime kídí aralo, ngok mííbasunam bí idung.

³Monam siilung aralo, apél esing kísa, milo yaamé aralo ngok mííbosunam bí idung. Ngo delokke ugyum aralo duulídung, delokke bíkke ayéde ngok nappalo tiidung.

⁴Bí ngome bíkke domanko ekumlo gíbola, ayang jandiem ngok teyolo tungkanto.

⁵Ngome loreenam onggur ayélok ralmo langka, delokke apél ayélok dobeng sumolangka! Kapeila ngo yagorupe míítí kolok, ralnam kaimang.

⁶Bíkke lakké alage ngok dumpong rumkíng danlo ila, lakbík alag loge ngome gomdung.

⁷E Jirusalem lok mime kídía, ngome arík lokke dumsung kídí lokla, sisuk kídí lok, nolu ngonyike ayang bosunamem, ipéé bimayé emla ngom pébi sulangka.

⁸Ngo ngokke mííbosunamke adudem tatpadung, bí dííte kídíem dukboola, díítum kídíem tígboola, ngokkíng dugadung.

⁹Ngok mííbosunam bí, sisuk kísa, demangkom dumsung yaaména kísa. Kaatola, ngoluk etor méélam esi, bí dakla, kirkilok kaangadung, delokke suppi pébarlok, kanggo sudung.

¹⁰Ngom míínabí ngome sipe podung: E ngok ayang bosuname, gerep tola, E ngokke mííbasuname, ngokkíng aatola,

¹¹Kaatola, dígíne gíla, pedong oyimang;

¹²amongso appune punlenkai, Miri ludí moodíe píngkai, delokke among so pekí-pettang adude lenkai.

¹³Tapang esing lokke ayé minlen dubong, onggur ayé minna aríe asarlo gyanggo dubong, E ngok ayang bosuname, gerep tola, ngokke mííba suname, ngokkíng aatola.

¹⁴Lííreng pénsamlo rusisuna pekí-pettang kísa inako no. Nok kampona migmoem ngome kaamoi, delokke tatporuna nok gomugem tatmoi.

¹⁵Ngoluke onggur bagane minkabong, dekena baganem loorímape ibina, ménsurung kídíem, aména ménsurung kídíem ngoluke legape umbikai.

¹⁶Ngok mííbosunam bí ngokke, delokke ngo bíkke. Bí bíkke mér alungem, lili appun kídí aralo,

¹⁷roh asare muyyinma tetengem, delokke kaamoe gíbídma tetengem yébodung. Bether díítelo yéna dumsung kísa, ayabosunam no sisuk kísa aalat sulangkuka.