Read Alladian SOLOMONKE MIRIE 5 Bible Online

SOLOMONKE MIRIE 5 - Alladian bible

SOLOMONKE MIRIE 5

¹Ngokke ayabosunam, ngokke mimepe ipene, ngo agíke baari aralo yégoodung. Ngo mir emla nampona ato-siroem ikumla, ngullang emla, tangut atii dakkengem, dodung; ngo ngokke apongem lang gakírem tíídung. Dotola, ayabosuna kídía, mííbosunam lok tíngír sumang abungem, Tíítola.

²Ngo amílsi ipdokom, aapísi ipmang. Eyablo pigadupe ngok mííbosunam me, ngo immalo kaato. E ngok ayarusunam ngokke pekíno, ngok mííbosunama, ngom aamo langka, ngok tukkusi tangarlok asidung, delokke ngok dumíd kídí sim, aapamlok baldíptung.

³Ngo ege-galugem bítpak sutubong, kape ngo leemo sukupen? Ngok alem arbín sutubong, kape ngo dem deema moyékun?

⁴Ngok mííbosuname eyablo pigadung, bíkke aanamem kaala, ngo ashénge ikén-iyén yimang.

⁵Bím ngo aamo lídung. Ngok alagem mir lok mollík sutung, delokke eyabem ngokke siyyape emla, iyadudem ngok lakkéngem mir lok mollík sutung.

⁶Idola ngok ayabosunam kepe, eyabem siyyaduem bí gíka kubong. Edítko ngo bík adudem tallítuan; ngo bím kaata gooto, idola kaapamato. Bím gogto, idola poyan sunam tatpamato.

⁷Doolungem lamkang duubomne ngome kaapala, ngome demla mola ito. Doolung yabgolo dagbomne, ngok dumlubem bétpak bito.

⁸E Jirusalemlok mime kídía, nolu bím kaapanamko kayémílo, ngo bík legape tumna kísa ila, amíle ralnam kaimang emla, pobiyé, emla pébi sulangka.

⁹Mimum takamem kampo yalumna no, nok mííbosunamde, abídem pemílo anguyana kua? Ngoluke pésu bompenam atoko, bík teyolo apekrupe kadunía?

¹⁰Ngok mííbosunam si yaamé dung, delokke raldung; jarying aralok bí gaiyalumne.

¹¹Bík migmoe pelamla uun morí kísa idung, Bík dumíde paak kísa yorala dumkeldung.

¹²Bík amig annyide yasina, siput kana roojik abelo, unna yasina pekí annyi kísa idung. Deme kaala gakírlok irsutung emla kaado.

¹³Nampona arí kana nesi-neyang bííbomnam baarikísa, bíkke mopumde idung. Mir alanglo pyomnam lili appun kísa bíkke nabbélde idung.

¹⁴Bík alag annyide, kamporupe pínameke, delo bí are kana asirna elíng koosiem gedung, Bík amílde saphir elínglok ilíknam tareng kísa pelamdung.

¹⁵Bíkke letík annyide, uun líídunglo pílík tunam, asirna marbol elíng adong kísa. Bík amíl-amoe bottela, kedonna sidar esing alekpe duuna, Lebanonke dííte kísa idung.

¹⁶Bík nappade mumpuppe tiinam alongdung, bíkke ségu moi-muang kídíde, ngome tummodung. E Jirusalemlok mime kídía, sike pemoko ngokke mííbosunam bí idune.