Read Alladian SOLOMONKE MIRIE 6 Bible Online

SOLOMONKE MIRIE 6 - Alladian bible

SOLOMONKE MIRIE 6

¹Mimum takamem kampo yalumne. Ingkolo nokke mííbosuname gíkan? Nome ngolu kanggul iguldope, nokke mííbosunamke bedang gítíngem, ngolum pobika.

²Ngokke mííbosuname, bíkke baarilo, nampona neyi-neyang kapomlo, bíkke simon-siliem dotké bikolo, delokke lili appunem puta gongkolo gíkai.

³Ngok mííbosunam bí ngokke, ngo bíkke, Lili appun aralo bí simon-siliem, dota mogodung.

⁴E ngok mííbosunam, no Jirusalem kísa kamporunako, no Tirjah doolung kísa ayangnamko. Jandiem tuubomla gína sipaying maglíng kísa no kaarapnamko.

⁵Nok amig annyide ngome kaasu yima, kapeila de ngom akén-ayén moimang. Gilead díítum lok dukyikuna mér alung kísa, nok dumíde murlat sudung.

⁶Mér alungem supakke írbín tunam kísa, nok iipang kídíde yasi sisi idung. Deke delokke atel kokom puumang, kamporupe takamde edíí dííyindung.

⁷Nok mopum annyide polum sunam, gasor aradelok asir lendung.

⁸Rojade raniem íying akkéko bomlai, éésiriem íying píínyiko bomlai, hanam yimanam mimumem ilai!

⁹Idola ngo midum atel komin, mííbosudune. Bí pekí kísa ayaruname. Bí bíkke ane lokke ome atele, delokke bík ane lokke ayayalum suname. Mime takame bím kaala koyitdung, delokke rani kídíe lang éésiri kídíe, bím miripe rínggedung.

¹⁰Séko doonyi saapat angun kísa idun? Bí poolo kísa kamponako, doonyi kísa angunnako; delokke dagdum suna takar kídí kísape kaarapnamko.

¹¹Ngo dalim appun punnamem kaape, onggur ríyong kídíem kaape, abíd arí kaana neyi-neyangem kaape, delokke badam esinglo magoope emla, yiibelo gítokto.

¹²Ngo dandung; no ngome ayang mííbosu legape, mimagem erap bomna guré gaari dugbomna kísa, erap motung.

¹³E Shulamke mime, aalat sutokula, aalat sutokula, ngolu nom kaadokupe, aalat sutokula, aalat sutokula. Mahanaim paksong soonamem kaanam kísa, kape nolu Shulamke mime me kaalíngkan?