Read Alladian SOLOMONKE MIRIE 8 Bible Online

SOLOMONKE MIRIE 8 - Alladian bible

SOLOMONKE MIRIE 8

¹No ngokke anelok anyun sunsanam bírope ituamílo edítko aiyan, Depe iduamílo bedu-bedalote ngo nome. gírík sula mumpup tokom, sékote atí emmayé.

²Nome ngokke ane ekumlo, ngome poyil nalo gíbo langkula, aaboyékuai. Delo ngo nome tííporuna onggur alangem tíímola, dalim alang emteng tíímoyai.

³Nokke lakké alage ngok dumpong rumkíso ila, nokke lakbíge ngom gomdung.

⁴E Jirusalemlok mime kídía, ngonyike ayang bosunamem ipéé bimayé, emla pésulangka.

⁵Sékoi mííbosunam milokongem, alaglok gombosula, yépol mooruklok aadakne? Nokke ane nom gelenla, okii kila nom olenko apél esing rumkílo ngo nome urreptoku.

⁶Nok aapí delo sékoke ayangemkom torík sumape, ngom petom torík sulangka. Nok alagde séko memkom gomrík sumape, ngom petom gomrík sulangka. Kapeila mííbosunam si sinam kísa ralnako, ayabosunam si lenmoyimana, ago arung kísanako. De emepe dorlenla, telokkai meyode dorlíkla inape idung.

⁷Mííbosunamke tíílídem, deddína asi lokteng tíísik sulamang, korong eteng sim biipak lamang. Ami kone agíke lumsa yimanam, arem tadok lok ayang mííbo sunamdem, repe itokom relamayé, depe imílo ngilkang kosuyé.

⁸Ngolukíng mimumpe ilenna bírmeko kadung, bí supak nyuntal tallen dungada. Yaamé kone bíme nyameng tadang mílo, ngolu kape iyénada?

⁹Bírme bí língkum etor kuamílo, ngolu bík legape, kedonna baldín ekumko mobiyai. Bí eyab kuamílo, ngolu sidar esing siipanglok, kampope pílumyai.

¹⁰Ngo língkum etor komin, Ngok anyun si língkum delokke kedonna ekume. Ngok mííbosunam kíng aapí eetedem ngo paadung, emla bí kénsudung.

¹¹Baal Hamon emko mooloplo, Solomon bí onggur baganko kadung. Delo arík ine bíkkíng bara ila mipile, éjar baldín nokdipe bila duudung.

¹²Idola ngok agíke onggur bagan sude, ngokkesue. E Solomon, éjar baldín nokdide nokke, delokke língko annyide arík ina buluke.

¹³E ngok mííbosunam, ngokke bagansok nok adudem tatmo langka; ngok angong kídare nok luponamem, tatlíla toyadung.

¹⁴E ngok ayala mííbosunam, arí nampona neyi-neyang kako dííte lokke dumsung kísa, demangkom sukbo bopang kísa ngokkíng aatola.