Read Alladian ISAIAH 1 Bible Online

ISAIAH 1 - Alladian bible

ISAIAH 1

¹Judah amolokke roja kídí Ujjiah, Jotham, Ahaj delokke Hejekiah buluke rojape idungem, Judah keelang Jirusalemke legape Amojke oo Isaiah me kaarí kaanyolo lengkanla ngiitom luname.

²RUUTUMbí podung, “Tani amonge lang talenge ngokke ponamsim tadbi langka. Ngokke usaa sunam ome-oo kídíe ngokke mirupe ilenkai.

³Bomnam taro kídíe agí ato em kénsudung, delokke gadoe agíke ato lokke dotko ibinamem kangkéndung, idola Israel kídíe kénpete kénmang, delokke ngok ami kídíe míngkén petemang.”

⁴Ah! Imem tebegem bottepe gela, nyokkupena, paab mílílo itína opín no mena-yatna, atímana ami kídí nolu, noluk paabe nolum nyokmodung. Nolu Israelke deena Shédíme mepaksula noluk lamkuem bíkkíng gekang sukai.

⁵Kape nolu mirolpe roltíkan? Yagoyape nolu iréénamem paalídunía? Noluke tukkue tarí mílípe, delokke noluke aapí-aange míídír mílípe itíkai.

⁶Noluke tukkulok ila letíng loope amíl edíína alop kote kamang. Tarí-tapa mílípe ila tasut mílípe bukyamdung. Noluke tarí kídar dem arbínla kuséréng ilíkla aipe ngotsula imang.

⁷Noluke amonge rukna amope ikai, noluke doolung kídíem eme guyin bomkai; noluke arík kídíem, noluke amig keralo mibo kídíe rotbomkai, delokke loorímape iyin bomkai.

⁸Doolungem mimage gargo bomnam kísa, pumrung ríkséng lokke duupé sukeng kísa, onggur arík lokke ippo kísa Jayonke ome agí atel petompe ikai.

⁹Ralya yalumna RUUTUM bí ami ayoko turmo mangamílo, ngolu Sodom keela Gomorrah ke kísa apíírupe nyokyai.

¹⁰E Sodomke ruutum kídí, RUUTUM ke agomem tatlangka. E Gomorrah ke ruutum kídía, Shédíke ayonem kangkén langka.

¹¹RUUTUM bí sipe podung, “Noluke deddípe ipak inam kídarde ngok keralo ingko agér koda biyén? Deddína ngelna simon-sili, delokke mér kídíeme romnam amanpe ipakname, ngok keralo alum asamape ngatdung. Ngo gooru, mér, delokke sobén kídíke iyyi kídar dem ashéng bommang.

¹²Edílo nolu ngome kaarík supe emla aayéme, séko siddína simon-siliem ngok Kumkeng Ekumlo tujém-saayém dope bomadope potone?

¹³Atí agér bimana ipakpe ipenam aman kídíem boma yimapeka. Noluke arí nampona romnam aman kídídem iyimapeka. Noluke poolo karsing adeng-ape, Sabbath, delokke abíd-abíd dormo gídum sunam kídídem, ngo kaalayimang, delokke belumkai.

¹⁴Noluke Poolo Karsing adeng-ape, delokke abíd abíd doman kídardem ngok aide kangkidung. Dekede ngok legape agér kamana eget kope idung, delokke dekedem ngo ítsamrupe getíla apéé along gekabong.

¹⁵“Edílo noluke alage yamtarla kumsuyédí, delo noluke keralok ngok amige runyok geyé. Nolu deddípe kumsu dokom ngo tadbimayé, kapeila noluk alag kídarde iyyipe líílatdung.

¹⁶Nolu dekedeme deedope arkut supotola, delokke imem agér iyimape, ngok kangkolok noluke atímana agér kídíem laabíntola.

¹⁷Ainem iyil sutola, deepítpe inam agérem matabom langka. Iréé-sinyonam kídíem igul langka. Ane-abu kaimana ome-uem ayalangka, delokke mime meyéng legape dagge bilangka.”

¹⁸RUUTUM bí sipe podung, “Agom-aangem aipe pojon bosulape. Noluke paabe yalí dagakom, dekede tapam kísa yasi yéku. De paab kídíde eerípe yalí dagakom, dekedem siipyak kísa yasi moyéku.

¹⁹Nolu agom-aang tatla ngome erappe mííbom yémílo, nolu asi-among lokke gairuna ato-siroem dopayé.

²⁰Idola nolu ngome akmín sula mirolpe iyémílo gíníng-yoksae nolume dobom yéku. RUUTUM ngo agí nappalok polendung.”

²¹Míngkesula yéna luune kone supak notiipe batkaku. Kera yénamlo deenampe yéla inakuane, supak paka-níkka bosu mílílo yétíkaku.

²²Jirusalem no kerape nokdi kísa asirtuai, idola supak are kaimang. Kerape no ardaruna apong kísape ituai, idola supak asi petompe ikaku.

²³Nokke ruutum kídarde mirolpe roltíla, doppyonake angongpe ilangkula, reko sulínge ila, aman-asan mílílo dugta tatígoola, ane-abu kaimana ome-uem ayang yimape, mime meyéngem dakge biyimape iyinkai.

²⁴Depeila RUUTUM Israelke Ralyayalumna Shédíbí sipe podung: “Ngokke miru kídar! Noluke teyolo ngo edo rayéku. Nolu edílote ngok keralo ebín-ebon ilayimayé.

²⁵Ngok alage noluke teyolo mirolpe aabomyé, delokke noluke deemang-amoem ikutla deebín moyéku.

²⁶Kerangke longe kísa nolum poyil penem, delokke ruutumpe ibopenem ngo ruulen biyéku. Depe irongem, Jirusalem me míngkesuna, delokke deena doolung kope hanyéku.”

²⁷Jayonme deepít biyéku, delokke míílat sukuna kídídem deemoyéku.

²⁸Idola mirolpe roltína amiem lang paabna kídíem atímape iyé, delokke séko bulu RUUTUM me mepak sududí dekede nyokyé.

²⁹Noluke kerangke ashébomla kumko, rotne esingdem annyinge igeyéku, delokke kumpom baaridem kaalangkula dukrupe mííyéku.

³⁰Nolu anne dílkutna esing kísa, delokke asi kamana baari kísa iyéku.

³¹Kapekísa ampomem ansoona mejérlok gudodí, delok kísa migang miramna ami kídíe, agíke aimana agérlok nyoksuyéku, delokke sékote dem nyoknam dem itum lamayé.