Read Alladian ISAIAH 11 Bible Online

ISAIAH 11 - Alladian bible

ISAIAH 11

¹Jesseke siitung lok ayinko yinlen yéku, delokke bíkke appír delok aagde ayé ééyéku.

²RUUTUMke Aidbí bíkkíng duumín geyé, gyan kelang míngkénnamke Aide, luyil-poyil kelang ralnamke Aide, kénnam kelang RUUTUMme pesomona Aide.

³Delokke RUUTUMke agom-aangem tadbi-kaabi kolo erbomname bíkkíng kayé. Bí amig kangkolok, demangkom nyorung tadkolok, agom-aangem lula kebang baamayé.

⁴Idola deenamlok ankínem bí agom lubiyé, delokke jonnamlok tani among sokke aatí-opanem kebang baabiyé. Bíkke nappang agom banggénlok tani amongem bí demyé. Bíkke nappang ngayaplok atímanem ikayé.

⁵Deenamde bíkke uugpe iyé, delokke míngke sunamde bíkke ugílo gasor gin-genampe iyé.

⁶Sipyange mér oolo yébosuyé, takar simyoe sobénlo ibbosuyé, Gooru-sobén koo kídíe myomur oolo dota goobosuyé, delokke tani koo améne bulum goobomyé.

⁷Gooru elang situme lekope dobosuyé, delokke buluke koo kídíe eetetpe ibbosuyé. Gooru-sobén kísa myomure ammung doyé.

⁸Koo ojinge bítpyor arulo imanla, buluke ketkolo alage yuang goola idokom atí kamayé.

⁹Shédíke deena díítum Jayonlo pesopenam, delokke atímane atí kamayé. Siyénglo kapekísa asi petome bíídakdí, delok kísape among sokom RUUTUMke kénname bííbomyé.

¹⁰Delo longe delo Jesseke Appírde, ami kídí lokke jandipe iyé. Opín tabunge bíkkíng míídasuyé, delokke bíkke apééla dungkoe angun-abéla iyé.

¹¹Delo longe delo lennyinape RUUTUMke ralna alage píílíkla, singong kídíem, yépit-yéyit goona ami kídíem, Assiria lok, Ijipt lok, Pathros lok, Kush lok, Elam lok, Shinar lok, Hamath lok, delokke siyéng bogralo duuna moopí among kídí loklang robenglo duuna kídí lok bí laayin aayéku.

¹²Bí opín-buang daadike kangkolo jandiko tuurepla, mibo amolo yédok-yéyok goona Israelem laadum suyéku. Bí yényok-yésok goona Judah ami kídíem, tani amongke kéényu-rego mipilok goodum suyéku.

¹³Delo Israel bí Judah ke mirupe, delokke Judah bí Israelke mirupe ibosuyimayé.

¹⁴Bínyi lekope ilangkula, anggodanlo duuna Philistain emlang sanggo danlo duuna ami kídíem maglíngpe gíbom langkula lííyéku. Bulu Edom emla Moabem ikumyéku, delokke Ammon amie buluke agom-aangem tatyéku.

¹⁵RUUTUM bí Ijipt lokke Suej Siyéng dem oojinmola, pamkina asareme mutmola Euphrates korongem oodope imoyé. Delo korong roojik kíníd petomko kamola, amie atí ebín kamape ansoona asidem kooladope imoyé.

¹⁶Israel kídíe Ijipt amolok lendokuem kape kísana bedange katuadí, delok kísape, Assiria amolo singong-sisona bodum-horum Israel ami legape bene-beponge kabiyé.