Read Alladian ISAIAH 13 Bible Online

ISAIAH 13 - Alladian bible

ISAIAH 13

¹Babilon legape Amojke oo Isaiahke kaalunam agome si:

²Míngkím suna dooludem mimakpe iabomdope, mílí kutkutna díítum teyong telo jandiem tungon dola érla bulume goglangka.

³RUUTUM bí bíkke aklí bomnam kídarem deena mimagem makla ingéédope, bíkke míngkím sunam delokke míídasunam maglíngem tomlendung.

⁴Tattola, deddína mití-maglíng gídud kísaneke dííte kídílo mandung. Tattola, deddína opín-buangke maglíng kídíe píídum sula, tatla yimanam adud muuna kísa ikai. Maglíngke RUUTUMbí mimak ipe leemo sukai.

⁵Tani among duurí lokkai mooteng lok bulu aadung. RUUTUM bí marlíngla among tabung sim loorímoma dupe imoyé.

⁶Kapla-rííla itola, kapeila RUUTUM ke longe píídak. Maglíngke RUUTUM keelok nyokmodí longe píídak.

⁷Mipilke alage lakbyayé, delokke aapí-aange yolyé.

⁸Yirí-pedípe míínam pesoe lang kinam-ramnam, buulíng-marlínge mipillo kayinyé.

⁹Kaatola, paab ina ami takamem nyokmodope, delokke tani among sim rukmo dope atímadí longe, yagorupe mardí longe, RUUTUMke longe píídak.

¹⁰Takar kídíe lang puune takar, delokke gatbung-gattok takame angun biyimayé, doonyie saadílo kaamoyé, delokke poolo ete angun biyimayé.

¹¹RUUTUM bí podung, “Ngo tani among sim atímang legape itung-iréyé, loorímana kídíem buluke paab legape itung-iréyé. Ngo míngkím suna kídíem lebíng rumkílo guba moyéku, delokke mili-hodong, mikír, delokke mikép amiem itung-iréyé.

¹²Delok longe kídí delok yépísuna kídardem gairuna uunem pemílo paaram yadope ngo imoyé.

¹³Maglíngke RUUTUM ngo, delo longe delo ngokke marnamem lengkanyé. Taleng kuppoem danmoyé, delokke tani amonge agí dungkollo duuyimayé.

¹⁴“Kaabomna kamana mér abam kísape, aptalo monbomnam sisuk kísape Babilonlo duuna mibo kídíe agíke yéko-dakko amonglo duklat suyin yéku.

¹⁵Delo umnam amiko kayémílo, bím níkkayé.

¹⁶Buluke ojing kídíem buluke amig keralo, adíne alop-alop idupe ijét-siyétla iyé, buluke ekumem lííbiyé, delokke buluke mime kídíem ipusiléé biyé.”

¹⁷RUUTUM bí podung, “Kaatola, uun, tadok, baldín, arem kídíem atí kopete míímana Medes amiem ngo Babilonke mirupe ruurepyé.

¹⁸Yaamé koo kídíem buluke ityi-epuk lok apkayé. Bulu améngona koo-kíang kídíem kom atí ayang kamayé.

¹⁹Kaldian ami kídí lokke míngkím subomnam, among yéta tabungke lunggupe ina Babilonem Sodom delokke Gomorrah kísa ngo nyokmoyéku.

²⁰Siirum-siirum loope bí kaimayé, delokke bíkkíng edílokom tanie doolungpe dunga bomyimayé. Mér kaabom nete mér kídíem delo yébo mayé, delokke magong-gígongna Arab amieteng delo notko ila dooyi mayé.

²¹Mooruk among lokke kebu-pettang, simon-sili yépompe de iyéku. Delo pettun kídíe asup supyéku. Ostrik pettang kídíe delo yébom yéku, delokke moonam sobéne delo tíkgong yéku.

²²Sipyang kídí lokke lang ménsurung kídí lokke uloe, kumruk kídí delok muulat suyéku. Babilonke nyokdí longe píídak! Bíkke longe kídíe gíyinpak yébong.”