Read Alladian ISAIAH 14 Bible Online

ISAIAH 14 - Alladian bible

ISAIAH 14

¹RUUTUM bí lekoda agíke Israel amilo ayang sulangkula, agí amipe bí ullen suyéku. Agíke amolo lekoda bulum duumo langkula, mibo kídíete lekope duubo suyéku.

²RUUTUMke binam amonglo, bulu lekoda aalat sudokupe deddína mibo ami kídíe igulyé. Delo mibo kídíe Israelke abílpe agér ibiyé. Israelem leko umtuana kídíem, Israele umyéku, delokke Israelem irééna kídí teyolo ruutumpe yébom yéku.

³Ingkona longelodí RUUTUMbí nolume, noluke supakke ami rumkílo abílpe ipusiléé kosula, ankí-keno adír paanam lok asar moyédí,

⁴delo longe delo nolu Babilon rojem sikepe lukang langka: “Iré-sinyola ina roje oletkai. Bíkke gai-gakongpe, anma-taka rupe iname iyinkai.

⁵RUUTUM bí, ipusiléénake roja banggénem dírpakto.

⁶Delok banggén delok marla amiem demkanatuai, deme aklílok yagorupe kitgo bomla deddína opín-buang kídíem ale rumkílo metuai.

⁷Idola supak among takame aapí eetet langkula ashéng miriem lulenkai.

⁸Yaari-bokina sidar esing elang siinang esing kídíete, nokke oletnam teyolo ashéla sipe ludung, ‘No supak oletkai, esing teena amie ngolukíng tenga yimayé.’

⁹“Uyu amonge, Babilon rojame ashépe kaaríkpe beleng lenkai, kerape tani among so ruutumpe yékína kídíke urom kídíe, roja nom kaaríkpe erlendung. Buluke paleng lok, kerangke roja kídíke urom kídíe gerep bomkai.

¹⁰Bulu airupe elík bosula, ‘Ngolu kísa nokome loorímangkai, delokke no ngolu kelo lekope ibosukai.

¹¹Babilon roje, nokke angun-abé kídíem, tapung muudud kídí takamem ago arulo laatok líkto. Tapum-tayinge rumkíng teyope nome bííbomkai.’

¹²“E, ngargoke takar puune, angunke oope ina, teyong among telok no oletkai. Deddína opín-buangem ale rumkílo tujémla kerape no ineíai. Idola supak nome among so yopletto.

¹³Nokke aapi-aang delo sipe lusuto, ‘Ngo teyong among telo saayé. Shédíke takar kídí teyolo, ngok roja palengem tungonyé. Deeya yalumna línggíng dííte teyong telo, kebang baapomlo rojape ngo duuyé.

¹⁴Ngo doomug kídíke teyong yalumlo resaayé. Ngo Kedon yalumna bíkke kísa agíem isuyé.’

¹⁵Idola nome eerí yalumna ago arunglo laatokto.

¹⁶“Nome kaana kídarde kaarí-kaanyope kaala lupo bosuyé, ‘Si ami sia, tani amongem tonbomla, delokke among yéta takamem danmone?

¹⁷Si ami sia, doolung luune tabungem nyokyinmola, among takamem yépol moorukpe imone? Si ami sia, bíkke abílpe umnam kídíem edílokom gílen mokumane?’

¹⁸Opín-buang tabungke roja kídíe buluke gai-gakona agolo ketyindung.

¹⁹Idola yoppaknam esing aag kísa nokke agolok nome laalen langkula, mimaklo sina maglíng kídíke simanglo no doobí-dooyél sukai. Depeila lííbung-língang arulo yoblíkla, ale tupupe nok simange ikai.

²⁰No agí amiem moka kayinla, agíke asi-amongem nyokyinmola ikolok, gai-gakongrupe rojaem yunam kísa nome yumayé. Atímanake edung-erang demte lupang-luyang kote kaisényi yimayé.

²¹Bíkke oo kídíemte moka pekoem irulangka. Buluke buku kídíke paab deemang legape, tani among so doolung luula, among sim yébom yimadope, bulum siirep kumope aimang.”

²²Ralyayalumna RUUTUM bí podung, “Ngo Babilonke mirupe ila, mimak iabomla nyokmoyé. Ngo delo ome-oo, delokke turngo-tursong atí kote kamomayé, apíí-píílí nyokkutmoyé. Sikepe RUUTUM ngo polendung.

²³Babilon me ngo pettun duupompe, delokke yuupyangpe idokupe batmoyéku. Ngo nyokmonana sampeklok bíme pekpakyéku. Sikepe Ralyayalumna RUUTUM ngo polendung.”

²⁴Ralyayalumna RUUTUMbí pésutung: “Ingkoem ngo míítodí dekepe iyé. Ingkoem iperung emla míngkadí, dekerupe ngo iyé.

²⁵Ngok amonglo Assiria kídí dem dírmíkyé. Ngok díítelok bíme tuletyé. Ngok ami lok bíkke tebekna baare em ngo joobínyé, delokke bíkke ebín tebegem gordulok joobínyé.

²⁶Simino tani among tabulo iperung emla ngokke míínam ségue, delokke ngokke alage opín-buang daadilo atímanem itung-irépe leedung sudung.”

²⁷Ralyayalumna RUUTUM kelo mííbom sunamko kadung. Sékoda deme ipéé sulayén? Bík alage leedu surodem sékoda leemap mola yékun?

²⁸Ahaj rojake sido delo sim kaalunam agom sim poto.

²⁹E Philistia ami kídía, nolum demna banggénde dírkai, emla ashémapeka. Edílo tabí kone siyédí, dem pakyana kone duuyan bomyéku. Tabíke apílok lekonem bíríbíde batlen lamanía?

³⁰RUUTUM bí aatí-opan kídíem kaabomne. Bulu aapí eetetpe yéyé. Idola Philistain noluke appír ete sandope bí dírí-kenoem melígla, noluke aralo midum atel kokom turmomayé.

³¹E Philistain kídíke doolung kídía, yagorupe peso-reyubla igul legape ulo jérla kapla-rííla itola; línggíng telok pesona atel kote kamana maglínge, deemul lok doomug kísape ila tokbom dak!

³²Philistia loge aana kotoki kídíem ingkona agom koi lubipene? Jayonem RUUTUM bí edíírupe pílíktung, delokke bíkke ankína ami kídare delo ashépe dungkeyé, emla bulume ngolu pobiyé.