Read Alladian ISAIAH 2 Bible Online

ISAIAH 2 - Alladian bible

ISAIAH 2

¹Judah keelang Jirusalemke legí-sigangem Amojke oo Isaiah ke kaalu-kangorla kaala poname:

²Angkupena longelo RUUTUM ke Kumkeng Ekum dungko dííte dem edíímola dííte takamem pemílo kedon yalumna kope imoyé. Delo deddína opín-buang kídíe gídum subomyé.

³Dekede dumsula sipe lubosuyé, “Kaju, Jakobke Shédí bíkke ekum dungko, RUUTUMke dííte delo gílaju. Bíkke bedalo ngolu gídokupé, bí ngolume luyil suyéku.” Jayonlok Shédíke ayone lenyé, delokke Jirusalem lok RUUTUMke agome polenyé.

⁴Bí deddína opín-buang ami kídíke piyyangem kebang lubiyé. Delo buluke yoksa kídíem itjépla, momo langkula aal gurnana pangpe imoyéku, delokke buluke gíníng kídíem kassikpe imoyéku. Opín kone opínkon teyolo yoksa hatsula orbom yimayé, delokke bulu midu-mimak legangem kényimayé.

⁵E Jakobke erang kídí, aatola. Kaju ngolu RUUTUMke angunlo gílaju.

⁶RUUTUM no agíke amipe ina Jakob ke ekumem mepak sukai. Bulu Sanggodan elokke uyu-uromem arope mííla Philistia ami kídí kísape líímé-tagil ila mibo-miyinglo alag lagrík sukai.

⁷Buluke amongde uun elang nokdie bííyam aloodung, iname buluke mireme remyindí kaimang. Buluke amongde guré mílí idung, iname guré gaarie alum-asamato.

⁸Buluke amongde mimang mílí kadung, iname bulu agí písunam mimangem kumla, agí alag ilen sunamem erbomdung.

⁹Depeila tani me améngonakope míísu modokupe igíp langka. Bulum asampe memapeka.

¹⁰Depeila bulu RUUTUMke marnam keralok, delokke bíkke angun-abé keralok díítum kídí lokke lííbung-língang bupík aralo runyok geyé, demangkom amolo arung konggela dunggeyé.

¹¹Tanike amig keralo kangkím sunamem lang aapílo míngkím sunamem nyokmodí longeko píídak. Delo longe delo RUUTUM atelme takame erkí geyé.

¹²Delo longe delo, Ralyayalumna RUUTUMbí, yagorupe botte-hanepe míísuna kídíem, míngkím along sula atí-sirí mape amiem míína kídíem, aapí amé dokupe ankang sumoyéku.

¹³Lebanonke kedonna sidar esing kídíem lang Bashan among lokke ok kídíem RUUTUM bí nyokmoyéku.

¹⁴Bí kedonna dííte kídíem lang díítum kídíem yiibe dope iyéku.

¹⁵Bí kedonna líísak ekum kídíem lang elíng etor kídíem imap mapyin yéku.

¹⁶Bí kamporuna delokke botteruna asi jaji kídíemte asilo jiilum moyéku.

¹⁷Tanike míngkíme lang botte-hane, mííte sunam aapí-aang kídíem nyokyin moyé.

¹⁸Mimang ato-siro kídarde nyokkut berokla, delo longe delo RUUTUM atel petomme takame yidla erkígeyé.

¹⁹Edílo RUUTUMbí among sime taronpe tona bomyédí, delo bíkke marnam keradelok dugnyok gepe delokke bíkke angun-abé ralnam keralok rusi supe ami kídíe, díítum lokke lííbung-língang bupík aralo duganggela, demangkom amolo arung konggela runyok geyé.

²⁰Delo longe delo agíe písula kumsunam uun lokke lang baldín lokke mimang kídíem, ami kídíe kebung lolang tappon kídílo yoppak biyé.

²¹Edílo RUUTUMbí among sime taronpe gerep bomyédí, delo ami kídíe bík marnam keralok dunyok gepe, delokke bíkke angun-abé pauar keralok rusi supe díítum lokke lííbung-língang bupík kídílo lang kédéng arung kídílo duknyok anggela runyok gela igong geyé.

²²Depeila tani teyolo míngke sumapeka, kapeila bíkkelo atíyang kamang, bí nyobulok asar ngana petom emin, iname bí ingko are koda kadun?