Read Alladian ISAIAH 21 Bible Online

ISAIAH 21 - Alladian bible

ISAIAH 21

¹Siyéng lokke robelo duuna yépol among legape kaalunam agome. Sokko danke among lok meyat yatsabomnam kísa, reyubko yépol-mooruk among lok mirue mimak iabomyé.

²Ngo yatkup-pakup bomsula, rotmín bosula inam kaarí-kaanyo pesorunamko kaato. Elam maglínge mimak iabomla, Media maglínge gargo bomla; Shédíbí Babilonke adír ilíknam tabungem kamo yimayé.

³Sim kaarí-kaanyo sime kaala-tatla, ngok amíl-amoe yagorupe kila, mime lokke okii kinam kísa kikai.

⁴Ngo pesolok danla, tukkuete ngekai. Adengem ngo mííbomto, idola de pakyape pesorían mokai.

⁵Kaarí-kaanyo delo kaaname, donameke irutung. Duupeko epuem putung. Maglíng ruutumkídíde dola- tííla ido. Depe ido pagem agomko lulígkai, “Migom kídar, menape noluke tamkungem irung lento!”

⁶Delo ngome RUUTUM bí sikepe poto, “Menape lamkang duunako dukkang moto. Depe ipala bíkke kaanamem pokan motoku.

⁷Bí dugbomna amiem, gurélo pumsupe dugbomdope, gado kídí emlang uut simon kídíem dugbomdola aadope kaayémílo bí bulum kanggappe aiyé.”

⁸Delo lamkang dagnade gogkai, “Ngok ruutuma, longe-yohpe ngo, ngokke dagpomlo dagtídung.

⁹Delokke kaatola, sina dugbomna kídíe, pumsupe gurélo duula aadakne!” Lamkang dagnade lubikai, “Babilon bí oletkai, oletkai; buluke kumtí bomnam mimang kídíe amonglo dírmíkla dooyinkai.”

¹⁰E ngok Israel ami kídía, gehuem yiknam kísa inam kídía, Ralya yalumna RUUTUM Israelke Shédí kelok, ngokke tatnamem nolum ngo popa bidung.

¹¹Si Edom legape kaalunam agome. Seir lok ngome amiko gogdo, “E lamkang dagna ami, edítko yoe kadung adan? Edíloi iyin yéne?”

¹²Ngo poyansuto, “Roe píídakbong. Idola yoh ekom pííyéku. No íngkíkupe míídumílo, lekoda aalat sulangkula íngkí langkuka.”

¹³Si Arabiake legape kaalunam agome. Arabiake mooruk amolo tombu sola notko ina Dedanke ami kídía;

¹⁴tíílína kídíem asi bitola; Temalo duuna ami kídía, mibo minnompe aana kídíem donamem biríktola.

¹⁵Kapeila pakapena yoksa loklang bulum apkapena iyyi epuklok, delokke midu-mimaklok bulu duknyok anggedung.

¹⁶RUUTUM bí ngome sipe poto, “Moodíem isap ibosula agér gérbosuna kísape, dítak atel aralo Kedar ami kídíke angun-abé kídíe nyokyé.

¹⁷Buluke ara lokke miram yalumna, iyyi epuk apjina kídí aralok anyongko amie turyé. RUUTUM Israelke Shédí ngo sipe podung.”