Read Alladian ISAIAH 23 Bible Online

ISAIAH 23 - Alladian bible

ISAIAH 23

¹Si Tur legape kaalunam agome: E Tarshish lokke asi jaji kídí, nolu kaplangka. Legade Ture nyokkai. Turke ekum atel koteng kaimang, delokke jaji angkén pekuete kaimang. Sim agom sim Saipras among lok aadokuem tatyinkai.

²E Sidon lokke bési-bépar ina ami kídía; adud-ayud kamalangka; E siyéng bograngke moopí mooloplo duuna kídía, ankílangka; nolum siyénglo bési-bépar ina kídíe mirem motung.

³Bottena siyéng lok Shihorke ali-aame lang Ijipt lokke donam-tííname píídumsula Turde pangkepe ila, opín-buang takamke pesi koret ipompe ine.

⁴Siyéng lokke lííreng ekumpe ina Sidon no annying sutola. Kapeila siyénge sipe podung, “Ngo edílokom okii kila koo okímang. Ngo edílokom ome-oo usangem kénkímang.”

⁵Edílo Ijipte legangem tatyédí, bí Tur kepe ankí kítí biyé.

⁶E Turke ami kídía, kapla-rííla ankíla Tarshish lo koola angge tola.

⁷Deddína dítak éjar keralokai ilen tonam, angun-abéna Tur doolungpe kadung ngadanía? Si doolung luune si deddína mibo mooteng amolo gígoola doolung kídíeme ilen goola imatonía?

⁸Kamporuna Tur doolung sokke bési-bépar igoona kídíe, uun dumlup gena roja oo kídíai. Sikepe ina Turme sékoda nyokdokupe imotone?

⁹Ralyayalumna RUUTUM bí imone. Buluke gai-gakong rupe ato agér inam takamlo míísula, botte-hane rupe míngkím sunamdem míímap sumola, amépe míísu dokupe ito.

¹⁰Noluke Nayil robeng amongem aríkpe ikítola, Tarshishke ome kídía. Nolume sékokom kaabomna kaimayé.

¹¹RUUTUM bí, bíkke alagem siyénglo yamtar bomla, delokke dei-degonglo duuna among kídíem kaimadope iyinto. Phoinesiake bépar ipom doolung dem nyokdope RUUTUM bí lulígto.

¹²Bí luto, “E Sidonke ami kídía, noluke luyé-luléde ngatbongkai. Supak nolu oletkai. Nolu Saipraslo koonyok gedokom, delote nolu dugpísula delo eetetpe duumayé.”

¹³Babilon ami kídíke amongem kaatola. Delokke ami kídíem supak sanpenam kaimang. Assiria kídíe, líísak ekum kídíeme bénpakla, byakruknam doolung kísape imola, mooruk lokke simon-sili yépompe imoto.

¹⁴E Tarshish lokke asi jaji kídí, nolu kapla-rííla itola. Kapeila noluke edíípe míídíng subomnam Ture nyokkai.

¹⁵Delo longe delo, roja lokke yénam apíng kísana takying kíníd moodíko Turme kénpang suyimayé. Idola takying kínídko irodem notii miri sokke kísa Turbí iyé:

¹⁶“E mitpan sutonam notii mime, no agíke harp tapungem bomla, doolung delokke rego mipílo gígong tola. Nome míípang sudokupe, gairupe miriem lula, tapung dem tatpo rudope itola.”

¹⁷Takying kínídko irongem Turke teyolo RUUTUM bí sadínem ruulík yéku. Delo bí notii agérlo ilangkula, tani amongke yéta takamlo bíkke pesi koredem iyin gooyéku.

¹⁸Idola dekena agér lok bíkke paapek paanam dem RUUTUM kepe mengu suyé. Deke deme asoope mekumla imayé. Dem paapek paanam abal kídar dem, RUUTUMme míngkesula kumsuna kídíke dope-tíípenam, delokke ege-galuk pe renayé.