Read Alladian ISAIAH 24 Bible Online

ISAIAH 24 - Alladian bible

ISAIAH 24

¹Kaatola, RUUTUM bí tani among sim benpak-benyakla atí kaimadupe iyé. Among sim nínge-níngkurla tani kídíem ipan-iran suyé.

²Mipil-miyongpe adírem akampe paayinyé. Miri ami kídíelang doolung ami kídíe, ruutum kídíelang abíl kídíe, rene lang kone, narne lang bine, delokke mireme lang opane adírem akampe paayinyé.

³Tani among si atí kaimadupe mílírupe iyé. Sikepe RUUTUM bí agomem podung.

⁴Kédéng si ereela rukkai. Tani among tabungsi rukla loorímangkai. Moone kédéng si pítílla ankang along sukai.

⁵Ami kídíe kédéng sim deema mokai. Bulu ayonem ige yimang. Bulu agínpe duuyarna daapong idongem betmoto.

⁶Depeila kédéng so béénamko kakai. Ami kídíde buluke imem dai em gepe aikai. Depeila kédéng so yékína taniem eme gula, gutung-gungonam tanie anyongoko kakai.

⁷Onggur kídíe ereela alang kaimangkai, depeila tíína takame adírkai.

⁸Buluke tapung muudud elang miri paksong adude nyokkai.

⁹Apong tííla miri luname kaimang, delokke tíílíng ragiem tíísik supeko kaimang.

¹⁰Doolungde atí kaimana kísa ikai. Ekum eyab takam emte sittum sula íkkap suyinkai.

¹¹Apong kaimala ami kídíe bedu-bedalo ulo goggongkai. Ashéng-angam tabude gípakkai; de tani among sok nyokkai.

¹²Doolung de mílírupe ila, yapgo eyab dete dírpakkai.

¹³Sikepe tani among tabungso, opín-buang takamlo iyinyé. Sikesi olib ayéem demkutnam kísa, demangkom onggur ayéem pílkutyém kaanam kísa iyé.

¹⁴Turna kídíe ashéng miri luyé. RUUTUMke angun-abé em anggo danlo duuna kídíe erkí geyé.

¹⁵Sanggodanlo duuna kídíe RUUTUMme rínggela, siyéng bogralo ami duuna kídíe RUUTUM, Israelke Shédíke amínem botterupe yidgeyé.

¹⁶Tani amonge duurí lokai, “Deena Atel kíng angun-abée kalangka,” emla miri lunamem ngolu tatdung. Idola ngok agí legape mííbom penam kamang. Ngo emumpe yépakto, reyubrupe adírem ngo paadak; yatna kídíe yattí berokkai.

¹⁷E tani amongke ami kídía, reyubruname, kobung-korunge, delokke díímí-oore nolum toyadung.

¹⁸Séko bulu pesorían adudlok dugge yédí, bulu kobung-korung lo oletyé. Séko bulu kobung lok resaang geyékudí, bulume díímí-oore níkríkyé. Taleng telok pedonge puumupe okatyé, delokke amongke dakkenge taronpe tonyé.

¹⁹Among kédénge barpan sula amíkpe iyé.

²⁰Asarlo ippoe tapkut-taplat sunam kísa, tíngír sune ngela gínam kísa tani among si beleyé. Tani amongke mirolpe inam paabde yagorupe tebegla lekokom darep yimadope oletyé.

²¹Longeko píídak, delo longe delo RUUTUM bí teyong amongke ralnamem lang tani amongke roja kídíem itung-iréyé.

²²Kobung arunglo lekope mepum-merum sunam kísa roja takamem umdumsula, buluke teyolo ajéng ludíe píímang tetengem bulume pateklo meyé.

²³Delo longe delo pooloe kaamoyé, delokke doonyie angun ngunyimayé, kapeila Ralyayalumna RUUTUM bí rojape iyé. Bí Jirusalemke Jayon Díítum teyolok ruutum bomyé, delokke ami kídíem yégebona kídíe bík angun-abéem kaayé.