Read Alladian ISAIAH 25 Bible Online

ISAIAH 25 - Alladian bible

ISAIAH 25

¹E RUUTUM, no ngokke Shédíe, Nok amínem ngo yidge-rínggeyé. No míngkén manam agérem inako, nokke agomem mesiisula kerapekai, ingkuem mííbomtodí, Dekepe apíí-pílí ipíínako.

²No doolung kídíeme bénpakla, nyokyin molangkula, miru kídíke líísak ekum kídíem dírmík mola kumrukpe imonako. Dekepe inam kídídem edílokom, doolungpe iyi kumayé.

³Depeila miram opín kídíe, nome yidge yaryé; atímana mikír opín kídíke, doolung siko takamlo nom pesogeyé.

⁴Opane lang atí ralnam kaimane, nokkíng dugpí sugela, ankí-keno longelo bulu ai-kamporupe nok alag aralo duudung. No bulume gumnam asarlok ipíla, delokke pamkilo ugyumpe ibidung. Kapeila mikírpe ila atírumana mirude, etorlo mutlíknam gumnam asar kísa, delokke yépollo pamkinam kísa idung.

⁵Kapekísa doomug ugyume pamkiem rengam modudí, delok kísa, miru kídíke ugbom namem no adud kaimadope imone, delokke buluke erbomla miri lunamem adud-ayudem omap mokune.

⁶Tani among takamke opín-buang legape gairuna donam-tíínamem irula Ralyayalumna RUUTUM bí Jayon Díítum so dobo-tííboyé.

⁷So díítum so, opín-buang takam teyolo dakjém bomna ankí-keno adír doomugem menang asak bí ipak biyé.

⁸Sinam-nyoknamem Ralyayalumna RUUTUM bí yénamlo kaimadope, nyokpak moyé. Takamke miksiem bí títbín biyé, delokke tani among rego mipílo ayang paayimape atung-aréépe yéna bík ami kídíke annyingem bí ibín biyé. Sikepe RUUTUM bí podung!

⁹Delo longe delo bulu sipe yidgeyé, “Aropakpe bí ngoluke Shédíe. Ngolu bíkkíng míngkesula ngolum bí ipíto. Ngoluke míída subomnam RUUTUM min bí. Bíkke turnam biko so kaju ngolu erla ashélaju.”

¹⁰Jayon Díítumem RUUTUM bí mopítyé, idola nesi-neyang delokke ammungem haarpe idope kapekísa pamíkla yaamodudí, delok kísape Moabem imíkla yaamoyé.

¹¹Asi byane kapekísa alage yamtarla byadudí, dekekísa buluke alage yamtar dagakom, buluke míngkímem, delokke buluke alag lok ségu takamem Shédíbí omap moyé.

¹²Moabke kedonna líísak etorem dírmola, otír-oyir sumola demulpe bí imoyé.